دِھی دا وَین
دِھی دا وَین جِس راتیں میں جیون جوگے اِس پِنڈے وچ آئی ناڑُو دب کے ساہ دِتّا یاں جیوندی قبر بنائی کؤڑے شہت دی گُڑھتی چکھ کے چِیک نُوں جِبھ تے سِیتا جنم جنم دا مَیلا پانی اَکھ نچوڑ کے پِیتا ماں نے مینوں چھاتی لا کے لُونی رَت چُوہنگائی پیو نے میرا مَتھا چُمیا پَیرِیں سنگلی پائی دادی ٹھنڈا ہؤکا بھریا دادے دھؤن جُھکائی گھر دِیاں کندھاں اُچیاں کیتیاں نِیویں چھت بنائی قد کڈھیا تے کُبڑی ہو گئی تاں نِیویں اکھوائی چؤنہہ پنجیاں تے ٹُرنا سِکھیا مینوں سُرت نہ آئی کوکے دی تھاں نتھ پئی تے والِیاں دی تھاں طعنے وِیرے لئی میں قلماں گھڑِیاں میرے ہتھ بس کاہنے کاہنیاں دا میں چھج بنایا بہہ کے دانے چھٹّے چُلہا چؤنکا کرکے سؤواں ماں فر وی مونہہ وٹّے نہ میں اکھ وچ کجلا پایا نہ میں گُت لمکائی نہ میں لُک لُک شیشہ تکیا نہ کِتے جھاتی پائی اَکھ چُکن دی ویہل نئیں سی سُفنے کِسراں اُن دی جے بولن دی جا ہوندی تیرے ظلم دی کھیڈ نُوں پُن دی ربا جے تُوں دِھی ہوندوں کدے واج نہ لاؤندوں کُن دی کدے واج نہ لاؤندوں کُن دی
English rendering
Dhi da wain Jis raatein main jeevan joge Is pinde vich aayi Naadu dab ke saah ditta Yaan jeondi qabr banayi Kaure shehad di ghut-ti chakh ke Cheek nu jibbh te seeta Janam janam da maila paani Akh nachod ke peeta Maan ne mainu chhaati la ke Loani rat chu-hangayi Pyo ne mera matha chumiya Paireen sangli payi Daadi thanda hauka bhariya Dade dhaun jhukayi Ghar diyan kandhaan uchiyan keetiyan Niwien chhat banayi Qad kadhiya te kubri ho gayi Taan niwien akhwayi Chonh panjian te turna sikhiya Mainu surat na aayi Koke di thaan nath payi Te waliaan di thaan taane Veere layi main qalam'aan gharhiyan Mere hath bas kaahne Kaahnian da main chhaj banaya Beh ke daane chhatte Chulha chaunka karke souaan Maan fir wi monha watte Na main akh vich kajla paya Na main gut lamkayi Na main luk luk sheesha takiya Na kitte jhaati payi Akh chukan di vehl nayin si Sufne kisraan un di Je bolan di ja hondi Tere zulm di kherh nu pundi Rabba je tu dhi hondon Kade waaj na laondon kun di Kade waaj na laondon kun di