کل جو رونے پر مرے ٹک دھیان اس کا پڑ گیا
کل جو رونے پر مرے ٹک دھیان اس کا پڑ گیا ہنس کے یوں کہنے لگا کچھ'' آنکھ میں کیا پڑ گیا؟'' بیٹھے بیٹھے آپ سے کر بیٹھتا ہوں کچھ گناہ پاؤں پڑنے کا جو اس کے مجھ کو چسکا پڑ گیا جنگ جوئی کیا کہوں اس کی کہ کل پرسوں میں آہ صلح ٹک ہونے نہ پائی تھی کہ جھگڑا پڑ گیا سوزش دل کچھ نہ پوچھو تم کہ ٹک سینے پہ رات ہاتھ رکھتے ہی ہتھیلی میں پھپھولا پڑ گیا بس کہ تھا بے بال و پر میں دامن صیاد پر خون بھی اڑ کر دم بسمل نہ میرا پڑ گیا جو مرے بد گو ہیں تم ان کو سمجھتے ہو بھلا واہ وا مجھ سے تمہیں یہ بیر اچھا پڑ گیا کیوں پڑا دم توڑتا ہے بستر غم پر دلا آہ کس بے درد کے ملنے میں توڑا پڑ گیا بہتری کا منہ نہ دیکھا مر ہی کر پائی نجات کڑھتے کڑھتے دل مرا بیمار ایسا پڑ گیا باتیں کرتے کرتے پیارے دل دھڑکنے کیوں لگا سن کے کچھ آہٹ کہو کیا دل میں کھٹکا پڑ گیا رک گیا ایسا ہی وہ جو پھر نہ آیا کل جو ٹک ہاتھ اس کے پاؤں پر بھولے سے میرا پڑ گیا میں تو یاں اس بات پر اپنے پڑا ملتا ہوں ہاتھ اور سارے شہر میں کچھ اور چرچا پڑ گیا گرچہ ہوں میں نام کو جرأتؔ پر اب اس کی طرف آنکھ اٹھا سکتا نہیں یہ دل میں خطرا پڑ گیا
English rendering
Kal jo rone par mere tik dhyaan us ka pad gaya Hans ke yun kehne laga kuchh ''aankh mein kya pad gaya?'' Baithe baithe aap se kar baithta hoon kuchh gunaah Paaun padne ka jo us ke mujh ko chaska pad gaya Jang-joi kya kahun us ki keh kal parson main aah Sulh tik hone na paayi thi keh jhagra pad gaya Sozish-e-dil kuchh na poochho tum keh tik seene pe raat Haath rakhte hi hatheli mein phaphola pad gaya Bas keh tha be-baal-o-par main daaman-e-sayyaad par Khoon bhi ud kar dam-e-bismil na mera pad gaya Jo mere bad-go hain tum un ko samajhte ho bhala Waah wa mujh se tumhein yeh bair achha pad gaya Kyun pada dam todta hai bistar-e-gham par dila Aah kis be-dard ke milne mein toda pad gaya Behtari ka munh na dekha mar hi kar paayi nijaat Kadhte kadhte dil mera beemaar aisa pad gaya Baatein karte karte pyaare dil dhadakne kyun laga Sun ke kuchh aahat kaho kya dil mein khatka pad gaya Ruk gaya aisa hi woh jo phir na aaya kal jo tik Haath us ke paaun par bhoole se mera pad gaya Main to yaan us baat par apne pada malta hoon haath Aur saare shahr mein kuchh aur charcha pad gaya Garche hoon main naam ko Jurrat par ab us ki taraf Aankh utha sakta nahin yeh dil mein khatra pad gaya