نہ گرمی رکھے کوئی اس سے خدایا
نہ گرمی رکھے کوئی اس سے خدایا شرارت سے جی جس نے میرا جلایا نہ بے چین ہو کوئی اب اس کی خاطر مرا چاہنا جو نہ خاطر میں لایا بہم دیکھ دو شخص ہو وہ بھی مضطر اکیلا میں جس کے لیے تلملایا پھرے جستجو میں نہ اب کوئی اس کی مجھے جس نے گلیوں میں برسوں پھرایا نہ بھولے سے یاد اب کرے کوئی اس کو مرا یاد کرنا بھی جس نے بھلایا نہ خوش ہو اب اس پاس بیٹھے سے کوئی ہمیں کر کے آزردہ جس نے اٹھایا خریدار پیدا نہ ہو کوئی اس کا کہ دل بیچ کر ہم نے دکھ جس سے پایا تحیر ہو دیکھ آئینہ اس کو جس نے ہمیں کر کے حیراں نہ مکھڑا دکھایا لگے لاگ اس سے کسی کی نہ یارب ہماری لگی کو نہ جس نے بجھایا کہوں داستاں میں گر اپنی اور اس کی تو حیران ہو سن کے اپنا پرایا کہ پہلے کی اظہار خود اس نے الفت نہ آیا تو سو بار گھر سے بلایا جتائیں وہ باتیں جنہیں سحر کہیے دکھایا وہ عالم کہ وحشی بنایا رکھی بے تکلف ملاقات چندے بہ منت مجھے پاس پہروں بٹھایا کسی کا نہ اک حرف خاطر میں گزرا اسے گرچہ لوگوں نے کیا کیا پڑھایا سو اب وہ جھلک تک دکھاتا نہیں ہے گیا میں جو گھر سے تو در تک نہ آیا لگاوٹ یہ کچھ کر کے پھر کیا غضب ہے مرا لگ گیا دل تو پردہ لگایا بہ تغییر بحر اور جرأتؔ غزل کہہ کہ یہ طرفہ مضمون تو نے سنایا
English rendering
Nah garmi rakhe koi us se khudaya Sharaarat se ji jis ne mera jalaya Nah bechain ho koi ab us ki khaatir Mera chaahna jo nah khaatir mein laaya Bahm dekh do shakhs ho woh bhi muztar Akela main jis ke liye tilmilaya Phire justajoo mein nah ab koi us ki Mujhe jis ne galiyon mein barson phiraya Nah bhoole se yaad ab kare koi us ko Mera yaad karna bhi jis ne bhulaya Nah khush ho ab us paas baithe se koi Hamein kar ke aazurdah jis ne uthaya Khareedaar paida nah ho koi us ka Keh dil bech kar hum ne dukh jis se paaya Tahayyur ho dekh aaina us ko jis ne Hamein kar ke hairaan nah mukhra dikhaya Lage laag us se kisi ki nah Ya Rab Hamaari lagi ko nah jis ne bujhaya Kahoon daastaan main gar apni aur us ki To hairaan ho sun ke apna paraya Keh pehle ki izhaar khud us ne ulfat Nah aaya to sau baar ghar se bulaya Jatayin woh baatein jinhein sehr kahiye Dikhaya woh aalam keh wehshi banaya Rakhi betakalluf mulaaqaat chande Ba minnat mujhe paas pehron bithaya Kisi ka nah ik harf khaatir mein guzra Use garchah logon ne kya kya parhaya So ab woh jhalak tak dikhata nahin hai Gaya main jo ghar se to dar tak nah aaya Lagaawat yeh kuchh kar ke phir kya ghazab hai Mera lag gaya dil to pardah lagaya Ba taghayyur-e-bahr aur Jurat ghazal keh Keh yeh turfah mazmoon tu ne sunaya