آ جائیں ہم نظر جو کوئی دم بہت ہے یاں — میر تقی میر
شاعر
آ جائیں ہم نظر جو کوئی دم بہت ہے یاں
آ جائیں ہم نظر جو کوئی دم بہت ہے یاں
مہلت ہمیں بسان شرر کم بہت ہے یاں
یک لحظہ سینہ کوبی سے فرصت ہمیں نہیں
یعنی کہ دل کے جانے کا ماتم بہت ہے یاں
حاصل ہے کیا سواے ترائی کے دہر میں
اٹھ آسماں تلے سے کہ شبنم بہت ہے یاں
مائل بہ غیر ہونا تجھ ابرو کا عیب ہے
تھی زور یہ کماں ولے خم چم بہت ہے یاں
ہم رہروان راہ فنا دیر رہ چکے
وقفہ بسان صبح کوئی دم بہت ہے یاں
اس بت کدے میں معنی کا کس سے کریں سوال
آدم نہیں ہے صورت آدم بہت ہے یاں
عالم میں لوگ ملنے کی گوں اب نہیں رہے
ہر چند ایسا ویسا تو عالم بہت ہے یاں
ویسا چمن سے سادہ نکلتا نہیں کوئی
رنگینی ایک اور خم و چم بہت ہے یاں
اعجاز عیسوی سے نہیں بحث عشق میں
تیری ہی بات جان مجسم بہت ہے یاں
میرے ہلاک کرنے کا غم ہے عبث تمہیں
تم شاد زندگانی کرو غم بہت ہے یاں
دل مت لگا رخ عرق آلود یار سے
آئینے کو اٹھا کہ زمیں نم بہت ہے یاں
شاید کہ کام صبح تک اپنا کھنچے نہ میرؔ
احوال آج شام سے درہم بہت ہے یاں
Ā jā'eñ hum nazar jo koī dam bahut hai yāñ
Ā jā'eñ hum nazar jo koī dam bahut hai yāñ
Muhlat hameñ basān-e-sharar kam bahut hai yāñ
Yak lahza sīna-kobī se fursat hameñ nahīñ
Ya'nī ke dil ke jāne kā mātam bahut hai yāñ
Hāsil hai kyā sivā'e tarā'ī ke dahr meñ
Uṭh āsmāñ tale se ke shabnam bahut hai yāñ
Mā'il ba-ghair honā tujh abrū kā aib hai
Thī zor yeh kamāñ vale kham o cham bahut hai yāñ
Hum rahravān-e-rāh-e-fanā der rah chuke
Waqfa basān-e-subh koī dam bahut hai yāñ
Is but-kade meñ ma'nī kā kis se kareñ savāl
Ādam nahīñ hai sūrat-e-ādam bahut hai yāñ
Ālam meñ log milne kī gūñ ab nahīñ rahe
Har chand aisā vaisā to ālam bahut hai yāñ
Vaisā chaman se sāda nikaltā nahīñ koī
Rangīnī ek aur kham o cham bahut hai yāñ
I'jāz-e-'īsavī se nahīñ bahs ishq meñ
Terī hī bāt jān-e-mujassam bahut hai yāñ
Mere halāk karne kā gham hai 'abas tumheñ
Tum shād zindagānī karo gham bahut hai yāñ
Dil mat lagā rukh-e-'araq-ālūd-e-yār se
Ā'īne ko uṭhā ke zamīñ nam bahut hai yāñ
Shāyad ke kām-e-subh tak apnā khinche na Mīr
Ahvāl āj shām se darham bahut hai yāñ
شاعر کے بارے میں
اردو شاعری کے عظیم شاعر میر محمد تقی میرؔ 1723 میں آگرہ میں پیدا ہوئے اور والد میر متقی کی علمی و صوفیانہ تربیت میں پرورش پائی۔ بچپن ہی میں والد ک...
مکمل تعارف پڑھیں