برنگ بوئے گل اس باغ کے ہم آشنا ہوتے — میر تقی میر
شاعر
برنگ بوئے گل اس باغ کے ہم آشنا ہوتے
برنگ بوئے گل اس باغ کے ہم آشنا ہوتے
کہ ہم راہ صبا ٹک سیر کرتے پھر ہوا ہوتے
سراپا آرزو ہونے نے بندہ کر دیا ہم کو
وگرنہ ہم خدا تھے گر دل بے مدعا ہوتے
فلک اے کاش ہم کو خاک ہی رکھتا کہ اس میں ہم
غبار راہ ہوتے یا کسو کی خاک پا ہوتے
الٰہی کیسے ہوتے ہیں جنہیں ہے بندگی خواہش
ہمیں تو شرم دامن گیر ہوتی ہے خدا ہوتے
تو ہے کس ناحیے سے اے دیار عشق کیا جانوں
ترے باشندگاں ہم کاش سارے بے وفا ہوتے
اب ایسے ہیں کہ صانع کے مزاج اوپر بہم پہنچے
جو خاطر خواہ اپنے ہم ہوئے ہوتے تو کیا ہوتے
کہیں جو کچھ ملامت گر بجا ہے میرؔ کیا جانیں
انہیں معلوم تب ہوتا کہ ویسے سے جدا ہوتے
Barang-e-bū-e-gul is bāgh ke hum āshnā hote
Barang-e-bū-e-gul is bāgh ke hum āshnā hote
Ke hum rāh-e-sabā ṭuk sair karte phir havā hote
Sarāpā ārzū hone ne banda kar diyā hum ko
Vagarna hum khudā the gar dil be-mudda'ā hote
Falak ai kāsh hum ko khāk hī rakhtā ke is meñ hum
Ghubār-e-rāh hote yā kisū kī khāk-e-pā hote
Ilāhī kaise hote haiñ jinheñ hai bandagī khwāhish
Hameñ to sharm dāman-gīr hotī hai khudā hote
Tū hai kis nāhiye se ai diyār-e-ishq kyā jānūñ
Tere bāshindagāñ hum kāsh sāre be-vafā hote
Ab aise haiñ ke sāni' ke mizāj ūpar baham pahuñche
Jo khātir-khwāh apne hum hue hote to kyā hote
Kahīñ jo kuchh malāmat gar bajā hai Mīr kyā jāneñ
Unheñ ma'lūm tab hotā ke vaise se judā hote
شاعر کے بارے میں
اردو شاعری کے عظیم شاعر میر محمد تقی میرؔ 1723 میں آگرہ میں پیدا ہوئے اور والد میر متقی کی علمی و صوفیانہ تربیت میں پرورش پائی۔ بچپن ہی میں والد ک...
مکمل تعارف پڑھیں