غم رہا جب تک کہ دم میں دم رہا — میر تقی میر
شاعر
غم رہا جب تک کہ دم میں دم رہا
غم رہا جب تک کہ دم میں دم رہا
دل کے جانے کا نہایت غم رہا
حسن تھا تیرا بہت عالم فریب
خط کے آنے پر بھی اک عالم رہا
دل نہ پہنچا گوشۂ داماں تلک
قطرۂ خوں تھا مژہ پر جم رہا
سنتے ہیں لیلیٰ کے خیمے کو سیاہ
اس میں مجنوں کا مگر ماتم رہا
جامۂ احرام زاہد پر نہ جا
تھا حرم میں لیک نامحرم رہا
زلفیں کھولیں تو تو ٹک آیا نظر
عمر بھر یاں کام دل برہم رہا
اس کے لب سے تلخ ہم سنتے رہے
اپنے حق میں آب حیواں سم رہا
میرے رونے کی حقیقت جس میں تھی
ایک مدت تک وہ کاغذ نم رہا
صبح پیری شام ہونے آئی میرؔ
تو نہ چیتا یاں بہت دن کم رہا
Gham rahā jab tak ke dam meñ dam rahā
Gham rahā jab tak ke dam meñ dam rahā
Dil ke jāne kā nihāyat gham rahā
Husn thā terā bahut 'ālam-fareb
Khatt ke āne par bhī ek 'ālam rahā
Dil na pahuñchā gosha-e-dāmāñ talak
Qatra-e-khūñ thā mizha par jam rahā
Sunte haiñ Lailā ke khaime ko siyāh
Is meñ Majnūñ kā magar mātam rahā
Jāma-e-ehrām zāhid par na jā
Thā haram meñ laek nā-mahram rahā
Zulfeñ kholīñ tū to ṭuk āyā nazar
'Umar bhar yāñ kām dil barham rahā
Us ke lab se talkh hum sunte rahe
Apne haq meñ āb-e-hayvāñ sam rahā
Mere rone kī haqīqat jis meñ thī
Ek muddat tak woh kāghaz nam rahā
Subh-e-pīrī shām hone āī Mīr
Tū na chītā yāñ bahut din kam rahā
شاعر کے بارے میں
اردو شاعری کے عظیم شاعر میر محمد تقی میرؔ 1723 میں آگرہ میں پیدا ہوئے اور والد میر متقی کی علمی و صوفیانہ تربیت میں پرورش پائی۔ بچپن ہی میں والد ک...
مکمل تعارف پڑھیں