جن کے لیے اپنے تو یوں جان نکلتے ہیں — میر تقی میر
شاعر
جن کے لیے اپنے تو یوں جان نکلتے ہیں
جن کے لیے اپنے تو یوں جان نکلتے ہیں
اس راہ میں وے جیسے انجان نکلتے ہیں
کیا تیر ستم اس کے سینے میں بھی ٹوٹے تھے
جس زخم کو چیروں ہوں پیکان نکلتے ہیں
مت سہل ہمیں جانو پھرتا ہے فلک برسوں
تب خاک کے پردے سے انسان نکلتے ہیں
کس کا ہے قماش ایسا گودڑ بھرے ہیں سارے
دیکھو نہ جو لوگوں کے دیوان نکلتے ہیں
گہ لوہو ٹپکتا ہے گہ لخت دل آنکھوں سے
یا ٹکڑے جگر ہی کے ہر آن نکلتے ہیں
کریے تو گلہ کس سے جیسی تھی ہمیں خواہش
اب ویسے ہی یہ اپنے ارمان نکلتے ہیں
جاگہ سے بھی جاتے ہو منہ سے بھی خشن ہو کر
وے حرف نہیں ہیں جو شایان نکلتے ہیں
سو کاہے کو اپنی تو جوگی کی سی پھیری ہے
برسوں میں کبھو ایدھر ہم آن نکلتے ہیں
ان آئینہ رویوں کے کیا میرؔ بھی عاشق ہیں
جب گھر سے نکلتے ہیں حیران نکلتے ہیں
Jin ke liye apne to yun jaan nikalte hain
Jin ke liye apne to yun jaan nikalte hain
Is rah mein we jaise anjaan nikalte hain
Kya teer-e-sitam us ke seene mein bhi toote the
Jis zakhm ko cherun hoon paikan nikalte hain
Mat sahl hamein jaano phirta hai falak barson
Tab khak ke parde se insan nikalte hain
Kis ka hai qumash aisa godad bhare hain sare
Dekho na jo logon ke diwan nikalte hain
Gah lohu tapakta hai gah lakht-e-dil aankhon se
Ya tukde jigar hi ke har aan nikalte hain
Kariye to gila kis se jaisi thi hamein khwahish
Ab waise hi yeh apne armaan nikalte hain
Jagah se bhi jaate ho munh se bhi khushan ho kar
We harf nahin hain jo shayan nikalte hain
So kahe ko apni to jogi ki si pheri hai
Barson mein kabhu idhar ham aan nikalte hain
In aaina-ruiyon ke kya Meer bhi ashiq hain
Jab ghar se nikalte hain hairan nikalte hain
شاعر کے بارے میں
اردو شاعری کے عظیم شاعر میر محمد تقی میرؔ 1723 میں آگرہ میں پیدا ہوئے اور والد میر متقی کی علمی و صوفیانہ تربیت میں پرورش پائی۔ بچپن ہی میں والد ک...
مکمل تعارف پڑھیں