قتل چھپتے تھے کبھی سنگ کی دیوار کے بیچ
قتل چھپتے تھے کبھی سنگ کی دیوار کے بیچ اب تو کھلنے لگے مقتل بھرے بازار کے بیچ اپنی پوشاک کے چھن جانے پہ افسوس نہ کر سر سلامت نہیں رہتے یہاں دستار کے بیچ سرخیاں امن کی تلقین میں مصروف رہیں حرف بارود اگلتے رہے اخبار کے بیچ کاش اس خواب کی تعبیر کی مہلت نہ ملے شعلے اگتے نظر آئے مجھے گلزار کے بیچ ڈھلتے سورج کی تمازت نے بکھر کر دیکھا سر کشیدہ مرا سایا صف اشجار کے بیچ رزق ملبوس مکاں سانس مرض قرض دوا منقسم ہو گیا انساں انہی افکار کے بیچ دیکھے جاتے نہ تھے آنسو مرے جس سے محسنؔ آج ہنستے ہوئے دیکھا اسے اغیار کے بیچ
English rendering
Qatl chhupte the kabhi sang ki deewar ke beech Ab to khulne lage maqtal bhare bazaar ke beech Apni poshak ke chhin jaane pe afsos na kar Sar salamat nahin rehte yahan dastaar ke beech Surkhiyan amn ki talqeen mein masroof rahin Harf barood ugalte rahe akhbar ke beech Kaash is khwab ki tabeer ki mohlat na mile Shole ugte nazar aaye mujhe gulzar ke beech Dhalte suraj ki tamazat ne bikhar kar dekha Sar kashida mera saya saf-e-ashjar ke beech Rizq, malboos, makan, saans, marz, qarz, dawa Munqasim ho gaya insan unheen afkaar ke beech Dekhe jaate na the aansoo mere jis se Mohsin Aaj hanste hue dekha usay aghyar ke beech