اتنا نہ اپنے جامے سے باہر نکل کے چل
اتنا نہ اپنے جامے سے باہر نکل کے چل دنیا ہے چل چلاؤ کا رستہ سنبھل کے چل کم ظرف پر غرور ذرا اپنا ظرف دیکھ مانند جوش غم نہ زیادہ ابل کے چل فرصت ہے اک صدا کی یہاں سوز دل کے ساتھ اس پر سپند وار نہ اتنا اچھل کے چل یہ غول وش ہیں ان کو سمجھ تو نہ رہ نما سائے سے بچ کے اہل فریب و دغل کے چل اوروں کے بل پہ بل نہ کر اتنا نہ چل نکل بل ہے تو بل کے بل پہ تو کچھ اپنے بل کے چل انساں کو کل کا پتلا بنایا ہے اس نے آپ اور آپ ہی وہ کہتا ہے پتلے کو کل کے چل پھر آنکھیں بھی تو دیں ہیں کہ رکھ دیکھ کر قدم کہتا ہے کون تجھ کو نہ چل چل سنبھل کے چل ہے طرفہ امن گاہ نہاں خانۂ عدم آنکھوں کے روبرو سے تو لوگوں کے ٹل کے چل کیا چل سکے گا ہم سے کہ پہچانتے ہیں ہم تو لاکھ اپنی چال کو ظالم بدل کے چل ہے شمع سر کے بل جو محبت میں گرم ہو پروانہ اپنے دل سے یہ کہتا ہے جل کے چل بلبل کے ہوش نکہت گل کی طرح اڑا گلشن میں میرے ساتھ ذرا عطر مل کے چل گر قصد سوئے دل ہے ترا اے نگاہ یار دو چار تیر پیک سے آگے اجل کے چل جو امتحان طبع کرے اپنا اے ظفرؔ تو کہہ دو اس کو طور پہ تو اس غزل کے چل
English rendering
Itna na apne jaame se bahar nikal ke chal Duniya hai chal chalau ka rasta sambhal ke chal Kam-zarf par ghuroor zara apna zarf dekh Manind-e-josh-e-gham na ziyada ubal ke chal Fursat hai ik sada ki yahan soz-e-dil ke saath Is par sipand-war na itna uchhal ke chal Ye ghool-vash hain in ko samajh tu na rahnuma Saye se bach ke ahl-e-fareb-o-daghal ke chal Auron ke bal pe bal na kar itna na chal nikal Bal hai to bal ke bal pe tu kuchh apne bal ke chal Insan ko kal ka putla banaya hai usne aap Aur aap hi woh kahta hai putle ko kal ke chal Phir aankhen bhi to di hain ki rakh dekh kar qadam Kahta hai kaun tujh ko na chal chal sambhal ke chal Hai turfa amn-gah nihankhana-e-adam Aankhon ke rubaru se to logon ke tal ke chal Kya chal sakega hum se ki pahchante hain hum Tu lakh apni chaal ko zalim badal ke chal Hai shama sar ke bal jo muhabbat mein garm ho Parwana apne dil se ye kahta hai jal ke chal Bulbul ke hosh nikhat-e-gul ki tarah uda Gulshan mein mere saath zara itr mil ke chal Gar qasd soo-e-dil hai tera ae nigah-e-yar Do char teer paikaan se aage ajal ke chal Jo imtihan-e-taba kare apna ae Zafar! To keh do usko taur pe tu is ghazal ke chal