کچھ اس طرح سے تصور میں آ رہا ہے کوئی
کچھ اس طرح سے تصور میں آ رہا ہے کوئی چراغ روح میں جیسے جلا رہا ہے کوئی کوئی کلیم اٹھے ورنہ انتظار کے بعد چراغ طورمحبت بجھا رہا ہے کوئی وہ دیر کا تھا کہ کعبے کا یہ نہیں معلوم مری خودی کا محافظ خدا رہا ہے کوئی جو روکنا ہو تو آ بڑھ کے روک لے ورنہ ترے حدود تغافل سے جا رہا ہے کوئی رواں دواں نہیں بے وجہ کاروان حیات مجھے ضرور کہیں سے بلا رہا ہے کوئی بدل رہے ہیں جنون و خرد کے پیمانے کس اہتمام تغیر سے آ رہا ہے کوئی نہ کچھ ملال اسیری نہ خطرۂ صیاد قفس سمجھ کے نشیمن بنا رہا ہے کوئی زمین و چرخ نے انکار کر دیا جس سے وہ بار دوش وفا پر اٹھا رہا ہے کوئی جہان نو میں برنگ کشاکش پیہم حیات نو کے سلیقے سکھا رہا ہے کوئی خبر کرو یہ حقائق کے پاسبانوں کو مجاز کھو کے حقیقت میں آ رہا ہے کوئی نہ جانے کون سی منزل میں عشق ہے کہ مجھے مرے حدود سے باہر بلا رہا ہے کوئی ڈرو خدا سے بڑا بول بولنے والو قریب ہم سے بھی بے انتہا رہا ہے کوئی مجھے ستم میں اضافے کا غم نہیں لیکن یقین کر کہ مرے بعد آ رہا ہے کوئی نگاہ و لب میں ہنسی کی سکت نہیں لیکن بہ جبر عشق و وفا مسکرا رہا ہے کوئی یہ صبح و شام کی یورش یہ موسموں کی روش کہ جیسے میرے تعاقب میں آ رہا ہے کوئی کسی کو اس کی خبر ہی نہیں تھی کچھ احسانؔ کہ مٹ کے اپنا زمانہ بنا رہا ہے کوئی
English rendering
Kuchh is tarah se tasawwur mein aa raha hai koi Charagh rooh mein jaise jala raha hai koi Koi Kaleem utthe warna intizaar ke baad Charagh-e-toor-e-mohabbat bujha raha hai koi Woh dair ka tha ke Ka'abe ka ye nahin maloom Meri khudi ka muhafiz khada raha hai koi Jo rokna ho to aa badh ke rok le warna Tere hudood-e-taghaful se ja raha hai koi Rawaan dawaan nahin be-wajah carvaan-e-hayat Mujhe zaroor kahin se bula raha hai koi Badal rahe hain junoon o khirad ke paimane Kis ihtimam-e-taghayyur se aa raha hai koi Na kuchh malaal-e-aseeri na khatra-e-sayyad Qafas samajh ke nasheman bana raha hai koi Zameen o charkh ne inkar kar diya jis se Woh baar-e-dosh-e-wafa par uttha raha hai koi Jahan-e-nau mein barang-e-kashakash-e-paiham Hayat-e-nau ke saliqe sikha raha hai koi Khabar karo ye haqaiq ke pasbanon ko Majaz kho ke haqeeqat mein aa raha hai koi Na jaane kaun si manzil mein ishq hai ke mujhe Mere hudood se bahar bula raha hai koi Daro khuda se bada bol bolne walo Qareeb hum se bhi be-inteha raha hai koi Mujhe sitam mein izafe ka gham nahin lekin Yaqeen kar ke mere baad aa raha hai koi Nigah o lab mein hansi ki sakat nahin lekin Ba-jabr-e-ishq o wafa muskara raha hai koi Ye subh o shaam ki yoorish ye mausamon ki rawish Ke jaise mere ta'aqub mein aa raha hai koi Kisi ko is ki khabar hi nahin thi kuchh Ehsan Ke mit ke apna zamana bana raha hai koi