کچھ اشارے تھے جنہیں دنیا سمجھ بیٹھے تھے ہم
کچھ اشارے تھے جنہیں دنیا سمجھ بیٹھے تھے ہم اس نگاہ آشنا کو کیا سمجھ بیٹھے تھے ہم رفتہ رفتہ غیر اپنی ہی نظر میں ہو گئے واہ ری غفلت تجھے اپنا سمجھ بیٹھے تھے ہم ہوش کی توفیق بھی کب اہل دل کو ہو سکی عشق میں اپنے کو دیوانہ سمجھ بیٹھے تھے ہم پردۂ آزردگی میں تھی وہ جان التفات جس ادا کو رنجش بے جا سمجھ بیٹھے تھے ہم کیا کہیں الفت میں راز بے حسی کیوں کر کھلا ہر نظر کو تیری درد افزا سمجھ بیٹھے تھے ہم بے نیازی کو تری پایا سراسر سوز و درد تجھ کو اک دنیا سے بیگانہ سمجھ بیٹھے تھے ہم انقلاب پے بہ پے ہر گردش و ہر دور میں اس زمین و آسماں کو کیا سمجھ بیٹھے تھے ہم بھول بیٹھی وہ نگاہ ناز عہد دوستی اس کو بھی اپنی طبیعت کا سمجھ بیٹھے تھے ہم صاف الگ ہم کو جنون عاشقی نے کر دیا خود کو تیرے درد کا پردا سمجھ بیٹھے تھے ہم کان بجتے ہیں محبت کے سکوت ناز کو داستاں کا ختم ہو جانا سمجھ بیٹھے تھے ہم باتوں باتوں میں پیام مرگ بھی آ ہی گیا ان نگاہوں کو حیات افزا سمجھ بیٹھے تھے ہم اب نہیں تاب سپاس حسن اس دل کو جسے بے قرار شکوۂ بیجا سمجھ بیٹھے تھے ہم ایک دنیا درد کی تصویر نکلی عشق کو کوہکن اور قیس کا قصہ سمجھ بیٹھے تھے ہم رفتہ رفتہ عشق مانوس جہاں ہوتا چلا خود کو تیرے ہجر میں تنہا سمجھ بیٹھے تھے ہم حسن کو اک حسن ہی سمجھے نہیں اور اے فراقؔ مہرباں نا مہرباں کیا کیا سمجھ بیٹھے تھے ہم
English rendering
Kuchh ishaare the jinhein duniya samajh baithe the hum Us nigah-e-aashna ko kya samajh baithe the hum Rafta rafta ghair apni hi nazar mein ho gaye Wah re ghaflat tujhe apna samajh baithe the hum Hosh ki taufeeq bhi kab ahl-e-dil ko ho saki Ishq mein apne ko deewana samajh baithe the hum Parda-e-aazurdagi mein thi wo jaan-e-iltifat Jis ada ko ranjish-e-be-ja samajh baithe the hum Kya kahein ulfat mein raaz-e-be-hasi kyun kar khula Har nazar ko teri dard-afza samajh baithe the hum Be-niyazi ko teri paaya sarasar soz-o-dard Tujh ko ek duniya se begana samajh baithe the hum Inqilab pai ba pai har gardish-o-har daur mein Is zameen-o-aasmaan ko kya samajh baithe the hum Bhool baithi wo nigah-e-naaz ahd-e-dosti Usko bhi apni tabiyat ka samajh baithe the hum Saaf alag hum ko junoon-e-aashiqi ne kar diya Khud ko tere dard ka parda samajh baithe the hum Kaan bajte hain mohabbat ke sukoot-e-naaz ko Dastaan ka khatm ho jaana samajh baithe the hum Baaton baaton mein payam-e-marg bhi aa hi gaya Un nigahon ko hayat-afza samajh baithe the hum Ab nahin taab-e-sipas-e-husn is dil ko jise Be-qarar-e-shikwa-e-be-ja samajh baithe the hum Ek duniya dard ki tasveer nikli ishq ko Kohkan aur Qais ka qissa samajh baithe the hum Rafta rafta ishq maanoos-e-jahan hota chala Khud ko tere hijr mein tanha samajh baithe the hum Husn ko ek husn hi samjhe nahin aur aye Firaq! Meharban na-meharban kya kya samajh baithe the hum