پیر نصیرالدین

English rendering

Sar-e-mai-khana koi parsa ab tak nahin aaya Hamein peene pilaane ka maza ab tak nahin aaya Kya waada magar woh be-wafa ab tak nahin aaya Khuda maaloom kab tak aayega ab tak nahin aaya Falak ki gardishein hairaan hain us ki be-misaali par Koi aisa sitamgar doosra ab tak nahin aaya Shabab aaya hijaab aaya adayen aa gayin un ko Nahin aaya to andaaz-e-wafa ab tak nahin aaya Nigahen un ki uthin ghoom phir kar ghair tak pahunchin Meri jaanib koi teer-e-qaza ab tak nahin aaya Tumhi ae ham-nasheeno naama-bar ki kuch khabar lao Zara phir dekh lo yeh kya kaha ab tak nahin aaya Hazaron ko hai daawa naakhudayi ka magar hum ko Nazar koi bhi saahil-ashna ab tak nahin aaya Mere nazdeek to uzr-e-khata inkaar-e-rehmat hai Khata-karon ko andaaz-e-khata ab tak nahin aaya Palat kar aa nahin sakta adam ki raah se koi Yeh duniya chhod kar jo bhi gaya ab tak nahin aaya Mere gham-khana-e-hasti ki shab tareek hai kitni Koi jugnu koi roshan diya ab tak nahin aaya Yeh ek tum ho ke ek muddat se hum ko bhoole baithe ho Yeh ek hum hi hain ke hum ko bhoolna ab tak nahin aaya Naseer! us ne dam-e-rukhsat na kiya kya khai thin qasmein Magar dekho zara woh be-wafa ab tak nahin aaya