سعید شارق

English rendering

Aankhoñ mein jam gaye hain nishaan, kaisi bhaap ke! Naabeena ho gaya hooñ teri aag taap ke Dastak, sakoot, cheekh, sada, shor, bazgasht Kya kya hain naam ab tere qadmoñ ki chaap ke! Hota nahiñ ta'aiyyun-e-jageer-e-hast-o-neest Hum khaak ho gaye yeh zameen maap maap ke Ab kaaṭne ko dauṛ raha hai sag-e-fana Aa toh gaya hooñ waqt ki deewar ṭaap ke Yooñ bhi dhuaañ hai tajruba-gah-e-wujood mein Karta hooñ tajrube gham-o-dil ke milaap ke Dunya thi munhamik kafan-o-dafn mein, udhar Bete mein saañs lene lage zakhm baap ke Rehta tha dil ko tangi-e-malboos ka gila Silwa diye hain kapṛe udaasi ke naap ke