صُبح کا سیل تھما، شام کی ندّی اُتری
صُبح کا سیل تھما، شام کی ندّی اُتری اور پھر شب کی خُنک جھیل میں کشتی اُتری یونہی کُھلنا تھا کہاں سحرِ شبستاں مجھ پر! خواب پہنا تو مِری آنکھ سے پٹّی اُتری مدتّوں بعد کسی یاد نے اخروٹ دھرے ڈرتے ڈرتے شجرِ دل سے گُلہری اُتری مَیں وہ تہ خانہ ہوں جو تُجھ سے بھرا رہتا تھا پھر کسی روز اُداسی مِری سیڑھی اُتری ان گنت شہروں سے گُزری تھی مِرے خواب کی ریل جانے کس وقت، کہاں، کون سواری اُتری! پاؤں اُٹھتے ہی نہ تھے بارِ پشیمانی سے موچ آئی تو مِرے سر سے یہ گٹھڑی اُتری اُس طرف بیلیں چڑھیں ہجر کی دیواروں پر اور اِدھر پیڑ کی جڑ تک کوئی آری اُتری ایک سا غم ہے مجھے اور مِرے آئینے کو اُس کی صورت بھی نظر آتی ہے اُتری اُتری ایسے عالم میں کوئی اور کہاں کام آیا! نا اُمیدی تھی، سو اُمّید پہ پُوری اُتری دفعتاً کُھل گئی دوشیزہء دُنیا مجھ پر یک بہ یک بال کُھلے، ساتھ ہی ساڑھی اُتری کیا کہوں! جِسم ہے تُو یا کوئی دریائے رواں! تُجھ کو چُھوتے ہی مِرے ہاتھ سے مٹّی اُتری مَیں نے بھر بھر کےپیے ضبط کے آنسو، شارق تب کہیں جا کے مِرے حلق سے ہڈّی اُتری
English rendering
Subh ka sail thama, shaam ki naddi utri Aur phir shab ki khunak jheel mein kashti utri Yunhi khulna tha kahan sehr-e-shabistaan mujh par! Khwab pehna to meri aankh se patti utri Muddato'n baad kisi yaad ne akhrot dhare Darte darte shajar-e-dil se gulahri utri Main woh teh-khaana hoon jo tujh se bhara rehta tha Phir kisi roz udaasi meri seedhi utri In gint shahron se guzri thi mere khwab ki rail Jaane kis waqt, kahan, kaun sawari utri! Paun uthte hi na the baar-e-pashaimani se Moch aayi to mere sar se yeh gathhri utri Us taraf belein chadhin hijr ki deewaron par Aur idhar ped ki jad tak koi aari utri Ek sa gham hai mujhe aur mere aayine ko Us ki soorat bhi nazar aati hai utri utri Aise aalam mein koi aur kahan kaam aaya! Na umeedi thi, so ummeed pe poori utri Daf'atan khul gayi dosheeza-e-duniya mujh par Yak ba yak baal khule, saath hi saadhi utri Kya kahoon! jism hai tu ya koi daryaa-e-rawan! Tujh ko chhote hi mere haath se mitti utri Main ne bhar bhar ke piye zabt ke aansoo, Shaariq Tab kaheen ja ke mere halq se haddi utri