اُس بَس میں ہوں جِس کی کوئی کھِڑکی نہیں کُھلتی
اُس بَس میں ہوں جِس کی کوئی کھِڑکی نہیں کُھلتی رَش اتنا زِیادہ ہے، سَڑک ہی نہیں کُھلتی! یُوں بھینچ کے رکھّا ہے تِری یاد کا سِکّہ اَب کھولنا چاہوں بھی تو مُٹّھی نہیں کھُلتی کھُل جاتا ہے آنکھوں میں اَچانک کوئی اَلبم لَیکن کوئی تَصویر بھی پُوری نہیں کھُلتی کِس طرح نِکالوں مَیں نئی شام کا جوڑا! اَلماری بضِد ہے: نہیں کھُلتی! نہیں کھُلتی! کُچھ ایسے لگائی ہے گِرہ دَستِ سحر نے مُجھ سے بھی مِرے خواب کی گٹھڑی نہیں کھُلتی آنچَل سے ڈھکا رَہتا ہے مَہتاب ہمیشہ شَب کھُلتی ہے مُجھ پر مَگر اِتنی نہیں کھُلتی باہر تو نکل آؤں مَیں زندانِ الم سے کم بخت مِرے صبر کی رسّی نہیں کھُلتی رَہ رَہ کے یہ کہتا ہے مِرا قُفل: مجھے کھول! اور مَیں ہوں کہ مُجھ پر مِری چابی نہیں کھُلتی کِس طرح بَندھائی ہے تِرے لَمس نے ڈھارس! اَب زَخم تو کھُل جاتا ہے پَٹّی نہیں کھُلتی مَیں گوہَرِ یَکتا ہوں عَجَب قَید میں، شارقؔ دُنیا پہ کُھلوں کیا؟ مِری سیپی نہیں کھُلتی
English rendering
Us bus mein hoon jis ki koi khidki nahin khulti Rash itna zyada hai, sadak hi nahin khulti! Yun bheenj ke rakha hai teri yaad ka sikka Ab kholna chahoon bhi to mutthi nahin khulti Khul jaata hai aankhon mein achaanak koi album Lekin koi tasveer bhi poori nahin khulti Kis tarah nikaloon main nayi shaam ka joda! Almari bazid hai: nahin khulti! nahin khulti! Kuch aise lagayi hai girah dast-e-sehr ne Mujh se bhi mere khwab ki gathhri nahin khulti Aanchal se dhaka rehta hai mehtaab hamesha Shab khulti hai mujh par magar itni nahin khulti Bahar to nikal aaun main zindaan-e-alam se Kam-bakht mere sabr ki rassi nahin khulti Reh reh ke yeh kehta hai mera qufl: mujhe khol! Aur main hoon ke mujh par meri chaabi nahin khulti Kis tarah bandhwayi hai tere lams ne dhaaras! Ab zakhm to khul jaata hai patti nahin khulti Main gauhar-e-yakta hoon ajab qaid mein, Shaariq! Duniya pe khuloon kya? Meri seepi nahin khulti