کشت دیار صبح سے تارے اگاؤں میں
کشت دیار صبح سے تارے اگاؤں میں جی چاہتا ہے نت نئے منظر دکھاؤں میں وہ شخص چیختا ہوا انبوہ بن چکا کس کس کو بولنے دوں کسے چپ کراؤں میں اب تو ہنسی بھی ختم ہے افسردگی بھی ختم لب بستۂ ازل تجھے کتنا ہنساؤں میں اک خواب مثل اشک نکل آئے چشم سے دروازۂ گماں جو کبھی کھٹکھٹاؤں میں تو آ چکا ہے دیکھ لیا مان بھی لیا اب اور کیا کروں تجھے سر پر بٹھاؤں میں کیا فرق پڑ سکے گا اندھیرے کی شرح میں کچھ دیر روشنی سے اگر بھر بھی جاؤں میں خاموش رہ کہ پھر تری آواز سن سکوں نظروں سے دور جا کہ تجھے دیکھ پاؤں میں آئینے اس طرح مجھے تکتا ہے کس لیے پہچان بھی لیا کہ تعارف کراؤں میں شارقؔ ہر ایک شکل سے ملتی ہے کوئی شکل آخر بدن پہ کون سا چہرہ لگاؤں میں
English rendering
Kasht-e-diyar-e-subah se taare ugaoon main Jee chahta hai nit naye manzar dikhaoon main Woh shakhs cheekhta hua anboh ban chuka Kis kis ko bolne doon kise chup karaoon main Ab to hansi bhi khatm hai afsurdagi bhi khatm Lab basta-e-azal tujhe kitna hansaon main Ik khwab misl-e-ashk nikal aaye chashm se Darwaza-e-gumaan jo kabhi khatkhataon main Tu aa chuka hai dekh liya maan bhi liya Ab aur kya karoon tujhe sar par bithaoon main Kya farq pad sakega andhere ki sharh mein Kuchh der roshni se agar bhar bhi jaon main Khamosh reh ke phir teri awaaz sun sakoon Nazron se door ja ke tujhe dekh paoon main Aainay is tarah mujhe takta hai kis liye Pehchan bhi liya ke taaruf karaoon main Shariq! har ik shakal se milti hai koi shakal Aakhir badan pe kaun sa chehra lagaoon main