مِری شاخ شاخ تھی بے ثمر، سو وہ سنگ ہات میں رہ گیا
مِری شاخ شاخ تھی بے ثمر، سو وہ سنگ ہات میں رہ گیا مگر اُس نگاہ کا ذائقہ مِرے پات پات میں رہ گیا کِسی گہری نیند کی رسّیوں سے بندھا ہُوا تھا مِرا وجود مَیں چلا تو آیا سویر تک مگر آدھا رات میں رہ گیا اِسی کُنجِ تیرہ میں بیٹھ کر یُونہی گُھورتا ہوں چٹان کو وہ تری تلاش میں کیا نکلتا جو غارِ ذات میں رہ گیا! تجھے کیا خبر! کہ ہم ایک ساتھ اُسی کے ملبے میں دب چُکے وہ مکان جو کہِیں مُسترد شُدہ نقشہ جات میں رہ گیا مجھے کون جار میں رکھ گیا جہاں لمس تک کو ترستا ہوں! مَیں: نئے زمانے کا سکّہ، کیسے نوادرات میں رہ گیا! یُونہی بیٹھے بیٹھے ہم ایک رات شکار بن گئے ہجر کا مَیں کسی کی گھات میں رہ گیا، کوئی میری گھات میں رہ گیا مِری گاچنی لگی تختیاں تری روشنائی سے بھر گئیں جو قلم رکھا تھا دوات میں وہ یُونہی دوات میں رہ گیا کوئی کھود پائے یہ شہرِچشم تو منکشف ہو یہ راز بھی کہ ترا خزینہ بھی میرے خوابوں کی باقیات میں رہ گیا مَیں عجب مزاج کا شعر تھا، مِری کیفیت تھی الگ تھلگ مجھے شاہکار غزل میں ڈھلنا تھا، فردیات میں رہ گیا اُسے دُوربینِ تخیّلات سے دیکھتا ہوں مَیں رات بھر کوئی، کہکشاں سے نِکل کے بھی، مِری کائنات میں رہ گیا
English rendering
Meri shaakh shaakh thi be-samar, so woh sang haath mein reh gaya Magar us nigah ka zaaiqa mere paat paat mein reh gaya Kisi gehri neend ki rassiyon se bandha hua tha mera wajood Main chala to aaya sawer tak magar aadha raat mein reh gaya Isi kunj-e-teera mein baith kar yunhi ghoorta hoon chataan ko Woh teri talaash mein kya nikalta jo ghaar-e-zaat mein reh gaya! Tujhe kya khabar! ke hum ek saath usi ke malbe mein dab chuke Woh makan jo kahin mustarad shudah naqsha-jaat mein reh gaya Mujhe kaun jaar mein rakh gaya jahan lams tak ko tarasta hoon! Main: naye zamane ka sikkah, kaise nawadiraat mein reh gaya! Yunhi baithe baithe hum ek raat shikar ban gaye hijr ka Main kisi ki ghaat mein reh gaya, koi meri ghaat mein reh gaya Meri gaachhni lagi takhtiyan teri roshnai se bhar gayin Jo qalam rakha tha dawaat mein woh yunhi dawaat mein reh gaya Koi khod paaye yeh shahr-e-chashm to munkashif ho yeh raaz bhi Ke tera khazeena bhi mere khwabon ki baqiyat mein reh gaya Main ajab mizaaj ka sher tha, meri kaifiyat thi alag thalag Mujhe shaahkaar ghazal mein dhalna tha, fardiyat mein reh gaya Use doorbeen-e-takhyyulat se dekhta hoon main raat bhar Koi, kahkashaan se nikal ke bhi, meri kainat mein reh gaya