بس اتنی رہ گئی اہل وفا کی داستاں باقی
بس اتنی رہ گئی اہل وفا کی داستاں باقی سر محشر بھی ہے ذکر جبین و آستاں باقی رہے گا آشیاں بھی گر رہے گا گلستاں باقی یہ ضد اب تو رہے گی عمر بھر اے باغباں باقی میں ہر نقش قدم پر جھوم کے سجدے میں گرتا ہوں رہے کیوں احترام کوچۂ پیر مغاں باقی مٹا سکتے نہیں حشر و قیامت بھی یہ دو چیزیں مرے سجدے رہیں گے اور ان کا آستاں باقی نظر جلووں میں گم ہے اور جلوے گم نگاہوں میں نہیں اب کوئی پردہ میرے ان کے درمیاں باقی نہ پھونک ان کو خدا کے واسطے اے برق رہنے دے انہیں دو چار تنکوں سے ہے نام آشیاں باقی دیا ساقی نے اپنے سر سے صدقہ کر کے پیمانہ نہ جب کوئی رہا جام شراب ارغواں باقی ابھی ہونے کو ہے جن سے تقاضائے اجل پیہم کچھ ایسے دن بھی ہیں منجملہ عمر رواں باقی دم آخر وہ آنسو بھی گرا مژگاں سے بستر پر جو اپنے درد دل کا رہ گیا تھا رازداں باقی نہ مجھ سا بھی کوئی ہو خانماں برباد دنیا میں کہ مر جانے پہ بھی ہیں سیکڑوں بربادیاں باقی دم رخصت بس اتنی آرزو ہے اے چمن والو ہمارے بعد بھی رکھنا خیال آشیاں باقی جبین شوق میں ایسا بھی اک بیتاب سجدہ ہے کہ ہے لغزش سے جس کی آبروئے آستاں باقی بہار لالہ و گل ہو کہ ہو رنگ شفق افقرؔ رہیں گی حشر تک خون وفا کی سرخیاں باقی
English rendering
Bas itni reh gayi ahl-e-wafa ki dastaan baqi Sar-e-mahshar bhi hai zikr-e-jabeen o aastan baqi Rahega ashiyan bhi gar rahega gulistan baqi Yeh zid ab to rahegi umar bhar aye baghban baqi Main har naqsh-e-qadam par jhoom ke sajde mein girta hoon Rahe kyun ehtram-e-koocha-e-peer-e-mughan baqi Mita sakte nahin hashr o qiyamat bhi yeh do cheezein Mere sajde rahenge aur un ka aastan baqi Nazar jalwon mein gum hai aur jalwe gum nigahon mein Nahin ab koi parda mere un ke darmiyan baqi Na phoonk in ko Khuda ke waste aye Barq rehne de Inhein do chaar tinkon se hai naam ashiyan baqi Diya Saqi ne apne sar se sadqa kar ke paimana Na jab koi raha jaam-e-sharab-e-arghawan baqi Abhi hone ko hai jin se taqaza-e-ajal paiham Kuchh aise din bhi hain minjumla-e-umar-e-rawan baqi Dam-e-akhir woh aansoo bhi gira mizhgan se bistar par Jo apne dard-e-dil ka reh gaya tha raazdaan baqi Na mujh sa bhi koi ho khanamani barbaad duniya mein Ke mar jaane pe bhi hain saikadon barbadiyan baqi Dam-e-rukhsat bas itni aarzoo hai aye chaman walo Hamare baad bhi rakhna khayal-e-ashiyan baqi Jabeen-e-shauq mein aisa bhi ik betaab sajda hai Ke hai laghzish se jis ki abroo-e-aastan baqi Bahar-e-lala o gul ho ke ho rang-e-shafaq Afqar Raheingi hashr tak khoon-e-wafa ki surkhiyan baqi