انگوٹھی
چھپاؤں کیوں نہ دل میں خاتم گوہر نگار اس کی یہی لے دے کے میرے پاس ہے اک یادگار اس کی یہ تنہائی میں میرے لب تک آ کر مسکراتی ہے اور اپنی مالکہ کی طرح دل کو گدگداتی ہے قلم کے ساتھ میرے ہاتھ میں ہر وقت رہتی ہے اور اس کے دست رنگیں کے فسانے مجھ سے کہتی ہے طلائی انگلیوں کا جب مجھے قصہ سناتی ہے تصور میں ستاروں کے سے پیکر کھینچ لاتی ہے مری سلمیٰؔ کو اس نے شاد اور ناشاد دیکھا ہے گہے مسرور گاہے مائل فریاد دیکھا ہے اسے معلوم ہیں اچھی طرح بیتابیاں اس کی نہیں پوشیدہ اس کی آنکھ سے بے خوابیاں اس کی شب تنہائی میں اس نے اسے بے دار پایا ہے اور اکثر دیدۂ سرشار کو خوں بار پایا ہے اسے معلوم ہے وہ کس طرح مغموم رہتی تھی کسی کے غم میں لطف زیست سے محروم رہتی تھی مرا خط پڑھ کے وہ کس کس ناز سے مسرور ہوتی تھی پھر اپنی بے بسی پر کس طرح رنجور ہوتی تھی یہ شاہد ہے کہ اس کی شام غم کیوں کر گزرتی تھی یہ شاہد ہے کہ وہ رو رو کے کیوں کر صبح کرتی تھی وہ جب دل تھام لیتی تھی ہجوم غم سے گھبرا کر تو یہ کرتی تھی اس کی غم گساری دل کے پاس آ کر اسے معلوم ہے جو درد تھا اس پاک سینے میں بسی ہیں اس کے دل کی دھڑکنیں اس کے نگینے میں پہنچتی ہیں شعاعیں اس کی جس دم چشم حیراں تک تصور مجھ کو لے اڑتا ہے سلمیٰؔ کے شبستاں تک جہاں سلمیٰؔ کے اور میرے سوا ہوتا نہیں کوئی انگوٹھی کھوئی جاتی ہے مگر کھوتا نہیں کوئی
English rendering
Chhupaun kyun na dil mein khatim-e-gauhar-nigar us ki Yehi le de ke mere paas hai ik yaadgar us ki Yeh tanhai mein mere lab tak aa kar muskurati hai Aur apni malka ki tarah dil ko gudgudati hai Qalam ke saath mere haath mein har waqt rehti hai Aur us ke dast-e-rangeen ke fasanay mujh se kehti hai Tilaii ungliyon ka jab mujhe qissa sunati hai Tasavvur mein sitaron ke se paikar kheench laati hai Meri Salma ko us ne shad aur nashad dekha hai Gahe masroor gahe mail-e-faryad dekha hai Use maloom hain achhi tarah betaabiyan us ki Nahin posheeda us ki aankh se be khwabiyan us ki Shab-e-tanhai mein us ne use be dar paya hai Aur aksar dida-e-sarshar ko khoon-bar paya hai Use maloom hai woh kis tarah maghmoom rehti thi Kisi ke gham mein lutf-e-zeest se mehroom rehti thi Mera khat padh ke woh kis kis naaz se masroor hoti thi Phir apni be-basi par kis tarah ranjoor hoti thi Yeh shahid hai ke us ki sham-e-gham kyun kar guzarti thi Yeh shahid hai ke woh ro ro ke kyun kar subh karti thi Woh jab dil tham leti thi hujoom-e-gham se ghabra kar To yeh karti thi us ki gham-gusari dil ke paas aa kar Use maloom hai jo dard tha us pak seene mein Basi hain us ke dil ki dhadkanein us ke nageene mein Pohunchti hain shua'ain us ki jis dam chashm-e-hairan tak Tasavvur mujh ko le udta hai Salma ke shabistan tak Jahan Salma ke aur mere siwa hota nahin koi Angoothi khoi jaati hai magar khota nahin koi