ایک شاعرہ کی شادی پر
اے کہ تھا انس تجھے عشق کے افسانوں سے زندگانی تری آباد تھی رومانوں سے شعر کی گود میں پلتی تھی جوانی تیری تیرے شعروں سے ابلتی تھی جوانی تیری رشک فردوس تھا ہر حسن بھرا خواب ترا ایک پامال کھلونا تھا یہ مہتاب ترا نکہت شعر سے مہکی ہوئی رہتی تھی سدا نشۂ فکر میں بہکی ہوئی رہتی تھی سدا شرکت غیر سے بیگانہ تھے نغمے تیرے عصمت حور کا افسانہ تھے نغمے تیرے شعر کی خلوت رنگیں تھی پری خانہ ترا مست خوابوں کے جزیروں میں تھا کاشانہ ترا غائب از چشم تھی جنت کی بہاروں کی طرح دست انساں سے تھی محفوظ ستاروں کی طرح صحبت غیر سے گھبراتی تھی تنہائی تری آئینے سے بھی تو شرماتی تھی تنہائی تری صبح کی طرح سے دوشیزہ تھی ہستی تیری بوئے گل کی طرح پاکیزہ تھی ہستی تیری نغمہ و شعر کے فردوس میں تو رہتی تھی یکسر الہام و ترنم تھا جو تو کہتی تھی تیرے اشعار تھے جنت کی بہاروں کے ہجوم تیرے افکار تھے زرین ستاروں کے ہجوم درد شعری کے تأثر سے تو مغموم تھی تو آسماں کا مگر اک غنچۂ معصوم تھی تو موج کوثر کا چھلکتا ہوا پیمانہ تھی غیر ہونٹوں کے تصور سے بھی بیگانہ تھی اب گوارا ہوئی کیوں غیر کی صحبت تجھ کو کیوں پسند آ گئی نا جنس کی شرکت تجھ کو اوج تقدیس کو پستی کی ادا بھا گئی کیوں تیری تنہائی کی جنت پہ خزاں چھا گئی کیوں شعر و رومان کے وہ خواب کہاں ہیں تیرے وہ نقوش گل و مہتاب کہاں ہیں تیرے کون سی طرفہ ادا بھا گئی اس دنیا میں خلد کو چھوڑ کے کیوں آ گئی اس دنیا میں ہو گئی عام تو نور مہ تاباں کی طرح آہ کیوں جل نہ بجھی شمع شبستاں کی طرح اپنی دوشیزہ بہاروں کو نہ کھونا تھا کبھی وہ کلی تھی تو جسے پھول نہ ہونا تھا کبھی عفتیں مٹ کے جوانی کو مٹا جاتی ہیں پھول کمھلاتے ہیں کلیاں کہیں کمھلاتی ہیں بلبل مست نوا دشت میں کیوں رہنے لگی نغمۂ تر کی جگہ مرثیہ کیوں کہنے لگی ہوس آلودہ ہوئی پاک جوانی تیری غیر کی رات ہے اب اور کہانی تیری کس کو معلوم تھا تو اس قدر ارزاں ہوگی زینت محفل و پامال شبستاں ہوگی جذب عفت کا میسر تھا جو عرفاں تجھ کو کیوں نہ مرغوب ہوا شیوۂ جاناں تجھ کو تیرگی حرص کی حوروں کو بھی بہکا ہی گئی تیرے بستر پہ بھی آخر کو شکن آ ہی گئی اب نہیں تجھ میں وہ حوروں کی سی عفت باقی حور تھی تجھ میں، گئی، رہ گئی عورت باقی ہاں وہ عورت جسے بچوں کا فسانہ کہئے بربط نفس کا اک فحش ترانہ کہئے جس میں ہے زہر عفونت کا وہ پیمانہ کہیں اک گناہوں کا بھبھکتا ہوا مے خانہ کہیں نوحہ خواں اپنی جواں موت کا ہونے دے مجھے مسکرا تو مگر اس حال پہ رونے دے مجھے
English rendering
Ae ke tha uns tujhe ishq ke afsanon se Zindagani teri aabaad thi romanon se Sher ki god mein palti thi jawani teri Tere sher-on se ubalti thi jawani teri Rashk-e-firdaus tha har husn bhara khwab tera Ek pamal khilona tha yeh mehtab tera Nikhath-e-sher se meheki hui rehti thi sada Nashe-e-fikr mein baheki hui rehti thi sada Shirkat-e-ghair se begana the naghme tere Ismat-e-hoor ka afsanah the naghme tere Sher ki khalwat-e-rangeen thi pari khanah tera Mast khwabon ke jaziron mein tha kashana tera Ghaib az chashm thi jannat ki baharon ki tarah Dast-e-insan se thi mehfooz sitaron ki tarah Sohbat-e-ghair se ghabrati thi tanhai teri Aaine se bhi tu sharmati thi tanhai teri Subh ki tarah se dosheeza thi hasti teri Boo-e-gul ki tarah pakiza thi hasti teri Naghma o sher ke firdaus mein tu rehti thi Yaksar ilhaam o tarannum tha jo tu kehti thi Tere ashaar the jannat ki baharon ke hujoom Tere afkar the zarrin sitaron ke hujoom Dard-e-she'ri ke ta'asur se tu maghmoom thi tu Aasman ka magar ik ghuncha-e-masoom thi tu Mauj-e-kausar ka chhalakta hua paimanah thi Ghair honton ke tasavvur se bhi begana thi Ab gawara hui kyun ghair ki sohbat tujh ko Kyun pasand aa gai na-jins ki shirkat tujh ko Auj-e-taqdees ko pasti ki ada bha gai kyun Teri tanhai ki jannat pe khazan chha gai kyun Sher o roman ke woh khwab kahan hain tere Woh naqoosh-e-gul o mehtab kahan hain tere Kaun si tarfah ada bha gai is duniya mein Khuld ko chhod ke kyun aa gai is duniya mein Ho gai aam tu noor-e-mah-e-taban ki tarah Aah kyun jal na bujhi shama-e-shabistan ki tarah Apni dosheeza baharon ko na khona tha kabhi Woh kali thi tu jise phool na hona tha kabhi Iffatain mit ke jawani ko mita jaati hain Phool kumhlahate hain kaliyan kahin kumhlahati hain Bulbul-e-mast nawa dasht mein kyun rehne lagi Naghma-e-tar ki jagah marsiya kyun kehne lagi Hawas aalooda hui pak jawani teri Ghair ki raat hai ab aur kahani teri Kis ko maloom tha tu is qadar arzan hogi Zeenat-e-mehfil o pamal-e-shabistan hogi Jazb-e-iffat ka mayassar tha jo irfan tujh ko Kyun na marghoob hua shewa-e-janan tujh ko Tareegi-e-hirs ki hooron ko bhi behka hi gai Tere bistar pe bhi akhir ko shikan aa hi gai Ab nahin tujh mein woh hooron ki si iffat baqi Hoor thi tujh mein, gai, reh gai aurat baqi Haan woh aurat jise bachchon ka afsanah kahe Barbat-e-nafs ka ik fahash tarana kahe Jis mein hai zehr-e-ufunat ka woh paimanah kahin Ik gunahon ka bhabhakta hua mai-khanah kahin Nauha khwan apni jawan maut ka hone de mujhe Muskura tu magar is haal pe rone de mujhe