مجھے لے چل
مری سلمیٰؔ مجھے لے چل تو ان رنگیں بہاروں میں! جہاں رنگیں بہشتیں کھیلتی ہیں سبزہ زاروں میں! جہاں حوروں کی زلفیں جھومتی ہیں شاخساروں میں جہاں پریوں کے نغمے گونجتے ہیں کوہساروں میں جوانی کی بہاریں تیرتی ہیں آبشاروں میں مری سلمیٰؔ! مجھے لے چل تو ان رنگیں بہاروں میں وہ مستانہ بہاریں جن پہ قرباں ارض جنت ہے جہاں ہر ذرہ اک گہوارۂ موج لطافت ہے جہاں رنگت ہی رنگت ہے جہاں نکہت ہی نکہت ہے محبت حکمراں ہے جن کے پاکیزہ دیاروں میں! مری سلمیٰؔ مجھے لے چل تو ان رنگیں بہاروں میں! وہ دوشیزہ فضائیں جنتوں کا ہے گماں جن پر چھڑکتا ہے مئے تسنیم و کوثر آسماں جن پر لٹاتی ہے سحاب حسن و طلعت کہکشاں جن پر سرور و نور و نکہت بستے ہیں جن کے ستاروں میں مری سلمیٰؔ! مجھے لے چل تو ان رنگیں بہاروں میں! جہاں شام و سحر نیلی گھٹائیں گھر کے آتی ہیں! افق کی گود میں نیلم کی پریاں مسکراتی ہیں! فضاؤں میں بہاریں ہی بہاریں لہلہاتی ہیں جہاں فطرت مچلتی ہے لہکتے ابر پاروں میں! مری سلمیٰؔ! مجھے لے چل تو ان رنگیں بہاروں میں! جہاں چاروں طرف باغ و گلستاں لہلہاتے ہیں شگفتہ وادیوں میں جنتوں کے خواب آتے ہیں جہاں معصوم طائر عشق کے نغمے سناتے ہیں اور ان کا لحن شیریں گونجتا ہے کوہساروں میں! مری سلمیٰؔ! مجھے لے چل تو ان رنگیں بہاروں میں! حکومت ہے جہاں صدق و صفا و مہر و الفت کی نشاط و عیش و عشرت کی سرور و لطف و راحت کی نسیم و انجم و گل کی نوا و نور و نکہت کی! محبت موجزن ہے جن کے دوشیزہ نظاروں میں مری سلمیٰؔ! مجھے لے چل تو ان رنگیں نظاروں میں! جہاں آباد یہ ناپاک شہرستاں نہیں ہوتے فسادی فتنہ پرور اور ذلیل انساں نہیں ہوتے یہ انساں ہاں یہ حیواں بد تر از شیطاں نہیں ہوتے فساد و شر جہاں سوتے ہیں خوابوں کے مزاروں میں! مری سلمیٰؔ! مجھے لے چل تو ان رنگیں نظاروں میں! بہشتوں کی لطافت ہے جہاں کی زندگانی میں مزہ آتا ہے کوثر کا جہاں کے سادہ پانی میں خدائی حسن عریاں ہے جہاں کی نوجوانی میں! صداقت کروٹیں لیتی ہے ساز دل کے تاروں میں مری سلمیٰؔ! مجھے لے چل تو ان رنگیں نظاروں میں! ''حیات دائمی'' لکھا ہوا ہے جن کے ایواں پر ارم زار ابد ہے سایہ زن جن کے خیاباں پر دوامیت کے جلوے چھا رہے ہیں باغ و بستاں پر گزر ممکن نہیں ہے موت کا جن کے نظاروں میں مری سلمیٰؔ! مجھے لے چل تو ان رنگیں نظاروں میں محبت میں جو ہو جاتا ہے پائندہ نہیں مرتا! صداقت جس کو کر دیتی ہے تابندہ نہیں مرتا! ہے جس میں عشق رقصاں وہ دل زندہ نہیں مرتا! نوائے ''لا فنا'' ہے روح کے خاموش تاروں میں مری سلمیٰؔ! مجھے لے چل تو ان رنگیں نظاروں میں!
English rendering
Meri Salma! Mujhe le chal tu in rangeen baharon mein! Jahan rangeen bahishtain khelti hain sabza zaron mein! Jahan hooron ki zulfain jhoomti hain shakhsaron mein Jahan pariyon ke naghme goonjte hain kohsaron mein Jawani ki baharain tairti hain aabsharon mein Meri Salma! Mujhe le chal tu in rangeen baharon mein Woh mastana baharain jin pe qurban arz-e-jannat hai Jahan har zarra ik gehwara-e-mauj-e-latafat hai Jahan rangat hi rangat hai jahan nikhath hi nikhath hai Mohabbat hukmaraan hai jin ke pakiza diyaron mein! Meri Salma! Mujhe le chal tu in rangeen baharon mein! Woh dosheeza fizaain jannaton ka hai gumaan jin par Chhirakta hai mai-e-tasneem o kausar aasman jin par Lutati hai sahab-e-husn o tal'at kahkashaan jin par Suroor o noor o nikhath baste hain jin ke sitaron mein Meri Salma! Mujhe le chal tu in rangeen baharon mein! Jahan sham o sahar neeli ghataain ghir ke aati hain! Ufaq ki god mein neelam ki pariyan muskurati hain! Fizaon mein baharain hi baharain lehlahati hain Jahan fitrat machalti hai lehakte abr paron mein! Meri Salma! Mujhe le chal tu in rangeen baharon mein! Jahan charon taraf bagh o gulistan lehlahate hain Shagufta wadiyon mein jannaton ke khwab aate hain Jahan masoom ta'ir ishq ke naghme sunate hain Aur un ka lehan-e-shireen goonjta hai kohsaron mein! Meri Salma! Mujhe le chal tu in rangeen baharon mein! Hukumat hai jahan sidq o safa o mehr o ulfat ki Nishat o aish o ishrat ki suroor o lutf o rahat ki Naseem o anjum o gul ki nawa o noor o nikhath ki! Mohabbat maujzan hai jin ke dosheeza nazaron mein Meri Salma! Mujhe le chal tu in rangeen nazaron mein! Jahan aabad yeh na-pak shahristan nahin hote Fasadi fitna parvar aur zaleel insan nahin hote Yeh insan, haan yeh haivan bad tar az shaitan nahin hote Fasad o shar jahan sote hain khwabon ke mazaron mein! Meri Salma! Mujhe le chal tu in rangeen nazaron mein! Bahishton ki latafat hai jahan ki zindagani mein Maza aata hai kausar ka jahan ke saada pani mein Khudai husn uryaan hai jahan ki naujawani mein! Sadaqat karwatein leti hai saz-e-dil ke taron mein Meri Salma! Mujhe le chal tu in rangeen nazaron mein! ''Hayat-e-Da'imi'' likha hua hai jin ke aiwan par Iram-zar-e-abad hai saya zan jin ke khayaban par Dawamiyat ke jalwe chha rahe hain bagh o bustan par Guzar mumkin nahin hai maut ka jin ke nazaron mein Meri Salma! Mujhe le chal tu in rangeen nazaron mein Mohabbat mein jo ho jata hai painda nahin marta! Sadaqat jis ko kar deti hai tabinda nahin marta! Hai jis mein ishq raqsan woh dil zinda nahin marta! Nawa-e-''La Fana'' hai rooh ke khamosh taron mein Meri Salma! Mujhe le chal tu in rangeen nazaron mein!