چھوٹا سا ایک کام ہمارا نہیں کیا
چھوٹا سا ایک کام ہمارا نہیں کیا باصرؔ تمہارے یار نے اچھا نہیں کیا رہتی رہی ہے کوئی نہ کوئی کمی ضرور ایسا نہیں کیا کبھی ویسا نہیں کیا دو چار بار دیکھ لو خود جا کے اس کے پاس کچھ بے سبب تو ہم نے کنارا نہیں کیا کہتے رہے ہو تم اسے ہمدرد و غم گسار اور اس نے بات کرنا گوارا نہیں کیا گر تھیں نگاہ میں مری کوتاہیاں تو ٹھیک اغیار نے تو کوئی اشارہ نہیں کیا حیراں ہوں لوگ کہتے ہیں کیوں اس کو چارہ گر جس نے کسی مریض کو اچھا نہیں کیا دن رات ہم کو قرض چکانے کی فکر ہے گو اس نے واپسی کا تقاضا نہیں کیا ہوتے جو آج ان کی نگاہوں میں سرفراز ہم نے تو کوئی کام بھی ایسا نہیں کیا
English rendering
Chhota sa ek kaam hamara nahin kiya Basir tumhare yaar ne achha nahin kiya Rahti rahi hai koi na koi kami zarur Aisa nahin kiya kabhi waisa nahin kiya Do char bar dekh lo khud ja ke uske pas Kuchh be-sabab to hum ne kinara nahin kiya Kahte rahe ho tum use hamdard-o-gham-gusar Aur us ne baat karna gawara nahin kiya Gar thin nigah mein miri kotahiyan to theek Aghyar ne to koi ishara nahin kiya Hairan hun log kahte hain kyun usko charagar Jis ne kisi mariz ko achha nahin kiya Din raat hum ko qarz chukane ki fikr hai Go us ne wapsi ka taqaza nahin kiya Hote jo aaj un ki nigahon mein sarfaraz Hum ne to koi kaam bhi aisa nahin kiya