باصر سلطان کاظمی

English rendering

Kahan siyasat-e-aghyar ne halak kiya Humein to apne hi afkar ne halak kiya Kisi ki maut ka baais thi khana veerani Kisi ko raunaq-e-gulzar ne halak kiya Kisi ke waste phoolon ki sej moujib-e-marg Kisi ko jadah-e-pur-khar ne halak kiya Kisi ko shola-e-khursheed ne jala dala Kisi ko saya-e-ashjar ne halak kiya Sawad-e-shaam kisi ke liye payam-e-ajal Kisi ko subh ke aasar ne halak kiya Kisi ki jaan gayi dekh kar tera jalwa Kisi ko hasrat-e-deedar ne halak kiya Koi shikar hua apni hichkichaahat ka Kisi ko jurat-e-izhaar ne halak kiya Kisi ka takhta bichhaya naseeb-e-khufta ne Kisi ko talay-e-bedaar ne halak kiya Wahi Halaku ke jis ne kiye hazaron halak Use bhi waqt ki yalghaar ne halak kiya Kisi ko maar gaya is ka kam sukhan hona Kisi ko kasrat-e-ash'aar ne halak kiya Wahi khasara hai sab ki tarah humein darpesh Humein bhi garmi-e-bazaar ne halak kiya Kabhi tabah hue mashwara na milne se Kabhi nawishta-e-deewar ne halak kiya Mili thi jis ke labon se nayi hayat humein Isi ki shokhi-e-guftaar ne halak kiya Khuda ka shukr ke pasti na hum ko kheench saki Humein bulandi-e-meyaar ne halak kiya