مضحکہ آؤ اڑائیں عشق بے بنیاد کا
مضحکہ آؤ اڑائیں عشق بے بنیاد کا اک جدا مدفن بنائیں تیشۂ فرہاد کا واہ واہ کیا رنگ بدلا گلشن ایجاد کا سایۂ گل پر گماں ہونے لگا صیاد کا بہہ چلا ہے اشک حسرت المدد اے برق یاس یہ بھی اک دانہ ہے میرے خرمن برباد کا کس نگاہ گرم سے دیکھا ہے اس نے وقت قتل آہ ٹھنڈی پڑ گئی دم گھٹ گیا فریاد کا غنچہ غنچہ خوف سے مجھ کو نظر آیا قفس پتے پتے پر ہوا دھوکا کف صیاد کا یہ سمجھ لیجے کسی شاعر کے دل کا ٹوٹنا ٹوٹ جانا ہے طلسم عالم ایجاد کا ہو نہ احساس اسیری تو رہائی ہے محال ایسے قیدی نام تک لیتے نہیں میعاد کا ضعف کی یہ ہمتیں ہیں ناتوانی کا یہ زور ٹکڑے ٹکڑے کر دیا دامن مری فریاد کا اس سخنور سے مجھے فیض سخن ہے اے حفیظؔ نام نامی ہے گرامی جس جہاں استاد کا
English rendering
Mazhaka aao udaein ishq-e-be-buniyad ka Ik juda madfan banayein tesha-e-Farhad ka Wah wah kya rang badla gulshan-e-ijaad ka Saya-e-gul par guman hone laga sayyad ka Beh chala hai ashk-e-hasrat almadad ae barq-e-yaas Yeh bhi ik dana hai mere khirman-e-barbad ka Kis nigah-e-garm se dekha hai us ne waqt-e-qatl Aah thandi pad gayi dam ghut gaya fariyad ka Guncha guncha khauf se mujh ko nazar aaya qafas Patte patte par hua dhoka kaff-e-sayyad ka Yeh samajh leejiye kisi shair ke dil ka tootna Toot jaana hai tilism-e-alam-e-ijaad ka Ho na ehsaas-e-aseeri to rihai hai muhal Aise qaidi naam tak lete nahin mi'aad ka Zaf ki yeh himmatein hain natavani ka yeh zor Tukde tukde kar diya daman meri fariyad ka Is sukhanwar se mujhe faiz-e-sukhan hai ae, Hafeez Naam nami hai girami jis jahan ustad ka