جو دور سے بھی نظر تجھ پہ یار ہم کرتے
جو دور سے بھی نظر تجھ پہ یار ہم کرتے ہزار جان گرامی نثار ہم کرتے ترے خیال سے باتیں ہزار ہم کرتے غم فراق کو یوں خوش گوار ہم کرتے ہوائے گل میں نہ پروائے خار ہم کرتے رہ طلب میں قدم استوار ہم کرتے ابھی کچھ اور دم واپسیں ٹھہر جاتا کچھ اور بھی جو ترا انتظار ہم کرتے وہ بار بار سزا جرم شوق پر دیتے مگر قصور وہی بار بار ہم کرتے ترے ستم کی شکایت ضرورت کیا تھی ہمیں کہ شوق سے گلۂ روزگار ہم کرتے غبار راہ محبت اگر کہیں ملتا تو اس کو تاج سر افتخار ہم کرتے دلوں کی دشت تمنا میں تھی فراوانی وہ کہتے ہیں کہ کہاں تک شکار ہم کرتے وہ وقت بھی کہیں آتا کہ عرض حال کے بعد تری جفا پہ تجھے شرمسار ہم کرتے ترا خیال نہ دل سے کسی طرح جاتا تجھے نہ بھولتے کوشش ہزار ہم کرتے جو نام آپ کا لیتے سکون غم کے لئے تو دل کو اور بھی کچھ بیقرار ہم کرتے سمجھ کے چھوڑ دئے بے حساب آخر کار کہ دل کے داغ کہاں تک شمار ہم کرتے ابھی سے تجھ پہ فدا ہو گئے تو غم کیا ہے کہ یہ وہی ہے جو پایان کار ہم کرتے بڑا گناہ کیا ترک مے سے شک میں پڑے یقین رحمت آمرزگار ہم کرتے عدو سے کیوں ہیں وہ راضی نہ کچھ کھلا حسرتؔ کہ پھر طریق وہی اختیار ہم کرتے
English rendering
Jo door se bhi nazar tujh pe yaar hum karte Hazar jaan-e-girami nisaar hum karte Tere khayal se baaten hazar hum karte Gham-e-firaq ko yoon khush-gawar hum karte Hawaye gul mein na parwaye khaar hum karte Rah-e-talab mein qadam istwar hum karte Abhi kuch aur dam waapsi thahar jata Kuch aur bhi jo tera intezaar hum karte Woh baar baar saza-e-jurm-e-shauq par dete Magar qasoor wahi baar baar hum karte Tere sitam ki shikayat zarurat kya thi hamein Ke shauq se gila-e-rozgar hum karte Ghubar-e-rah-e-mohabbat agar kahin milta To us ko taj-e-sar-e-iftekhar hum karte Dilon ki dasht-e-tamanna mein thi farawani Woh kehte hain ke kahan tak shikar hum karte Woh waqt bhi kahin aata ke arz-e-haal ke baad Teri jafa pe tujhe sharmsaar hum karte Tera khayal na dil se kisi tarah jata Tujhe na bhoolte koshish hazar hum karte Jo naam aap ka lete sukoon-e-gham ke liye To dil ko aur bhi kuch beqarar hum karte Samajh ke chhod diye be-hisab akhir kar Ke dil ke daagh kahan tak shumar hum karte Abhi se tujh pe fida ho gaye to gham kya hai Ke yeh wahi hai jo payan-e-kar hum karte Bada gunah kiya tark-e-mai se shak mein pade Yaqeen rahmat-e-aamarzgar hum karte Adoo se kyoon hain woh raazi na kuch khula Hasrat! Ke phir tareeq wahi ikhtiyar hum karte