آپ اپنا غبار تھے ہم تو
آپ اپنا غبار تھے ہم تو یاد تھے یادگار تھے ہم تو پردگی ہم سے کیوں رکھا پردہ تیرے ہی پردہ دار تھے ہم تو وقت کی دھوپ میں تمہارے لیے شجر سایہ دار تھے ہم تو اڑے جاتے ہیں دھول کے مانند آندھیوں پر سوار تھے ہم تو ہم نے کیوں خود پہ اعتبار کیا سخت بے اعتبار تھے ہم تو شرم ہے اپنی بار باری کی بے سبب بار بار تھے ہم تو کیوں ہمیں کر دیا گیا مجبور خود ہی بے اختیار تھے ہم تو تم نے کیسے بھلا دیا ہم کو تم سے ہی مستعار تھے ہم تو خوش نہ آیا ہمیں جیے جانا لمحے لمحے پہ بار تھے ہم تو سہہ بھی لیتے ہمارے طعنوں کو جان من جاں نثار تھے ہم تو خود کو دوران حال میں اپنے بے طرح ناگوار تھے ہم تو تم نے ہم کو بھی کر دیا برباد نادر روزگار تھے ہم تو ہم کو یاروں نے یاد بھی نہ رکھا جونؔ یاروں کے یار تھے ہم تو
English rendering
Aap apna ghubar the hum to Yaad the yaadgar the hum to Pardagi hum se kyun rakha parda Tere hi parda-daar the hum to Waqt ki dhoop mein tumhare liye Shajar saya-daar the hum to Ude jaate hain dhool ke maanind Aandhiyon par sawar the hum to Hum ne kyun khud pe aetibar kiya Sakht be-aetibar the hum to Sharm hai apni baar-baari ki Be-sabab baar baar the hum to Kyun hamein kar diya gaya majboor Khud hi be-ikhtiyar the hum to Tum ne kaise bhula diya hum ko Tum se hi mustaar the hum to Khush na aaya hamein jiye jaana Lamhe lamhe pe baar the hum to Seh bhi lete hamare ta'non ko Jaan-e-man jaan-nisar the hum to Khud ko dauran-e-haal mein apne Be-tarah nagawar the hum to Tum ne hum ko bhi kar diya barbaad Nadir-e-rozgar the hum to Hum ko yaaron ne yaad bhi na rakha Jaun yaaron ke yaar the hum to