الٹی ہو گئیں سب تدبیریں کچھ نہ دوا نے کام کیا
الٹی ہو گئیں سب تدبیریں کچھ نہ دوا نے کام کیا دیکھا اس بیماری دل نے آخر کام تمام کیا عہد جوانی رو رو کاٹا پیری میں لیں آنکھیں موند یعنی رات بہت تھے جاگے صبح ہوئی آرام کیا حرف نہیں جاں بخشی میں اس کی خوبی اپنی قسمت کی ہم سے جو پہلے کہہ بھیجا سو مرنے کا پیغام کیا ناحق ہم مجبوروں پر یہ تہمت ہے مختاری کی چاہتے ہیں سو آپ کریں ہیں ہم کو عبث بدنام کیا سارے رند اوباش جہاں کے تجھ سے سجود میں رہتے ہیں بانکے ٹیڑھے ترچھے تیکھے سب کا تجھ کو امام کیا سرزد ہم سے بے ادبی تو وحشت میں بھی کم ہی ہوئی کوسوں اس کی اور گئے پر سجدہ ہر ہر گام کیا کس کا کعبہ کیسا قبلہ کون حرم ہے کیا احرام کوچے کے اس کے باشندوں نے سب کو یہیں سے سلام کیا شیخ جو ہے مسجد میں ننگا رات کو تھا مے خانے میں جبہ خرقہ کرتا ٹوپی مستی میں انعام کیا کاش اب برقعہ منہ سے اٹھا دے ورنہ پھر کیا حاصل ہے آنکھ مندے پر ان نے گو دیدار کو اپنے عام کیا یاں کے سپید و سیہ میں ہم کو دخل جو ہے سو اتنا ہے رات کو رو رو صبح کیا یا دن کو جوں توں شام کیا صبح چمن میں اس کو کہیں تکلیف ہوا لے آئی تھی رخ سے گل کو مول لیا قامت سے سرو غلام کیا ساعد سیمیں دونوں اس کے ہاتھ میں لا کر چھوڑ دیئے بھولے اس کے قول و قسم پر ہائے خیال خام کیا کام ہوئے ہیں سارے ضائع ہر ساعت کی سماجت سے استغنا کی چوگنی ان نے جوں جوں میں ابرام کیا ایسے آہوئے رم خوردہ کی وحشت کھونی مشکل تھی سحر کیا اعجاز کیا جن لوگوں نے تجھ کو رام کیا میرؔ کے دین و مذہب کو اب پوچھتے کیا ہو ان نے تو قشقہ کھینچا دیر میں بیٹھا کب کا ترک اسلام کیا
English rendering
Ulti ho gayin sab tadbeerein kuchh na dawa ne kaam kiya Dekha is bimari-e-dil ne aakhir kaam tamam kiya Ahd-e-jawani ro ro kata peeri mein lein aankhen moond Ya'ni raat bahut the jaage subah hui aaram kiya Harf nahin jaan-bakhshi mein us ki khoobi apni qismat ki Ham se jo pehle keh bheja so marne ka paigham kiya Nahaq ham majbooron par yeh tuhmat hai mukhtari ki Chahte hain so aap karein hain ham ko abas badnam kiya Sare rind-e-obash jahan ke tujh se sujood mein rehte hain Banke tedhe tirchhe teekhe sab ka tujh ko imam kiya Sar-zad ham se be-adabi to wahshat mein bhi kam hi hui Koson us ki aur gaye par sajda har har gaam kiya Kis ka Kaaba kaisa Qibla kaun Haram hai kya Ehram Kuche ke us ke bashindon ne sab ko yahin se salam kiya Shaikh jo hai masjid mein nanga raat ko tha may-khane mein Jubba khirqa kurta topi masti mein inaam kiya Kash ab burqa munh se utha de warna phir kya hasil hai Aankh moonde par un ne go didar ko apne aam kiya Yan ke safed o siyah mein ham ko dakhl jo hai so itna hai Raat ko ro ro subah kiya ya din ko jun tun sham kiya Subah chaman mein us ko kahin takleef hawa le aayi thi Rukh se gul ko mol le liya qamat se sarv ghulam kiya Sa'id-e-simeen donon us ke hath mein la kar chhod diye Bhole us ke qaul o qasam par haye khayal-e-kham kiya Kaam hue hain sare zaya' har sa'at ki sama'at se Istaghna ki chauguni un ne jun jun main ibram kiya Aise aahu-e-ram-khurda ki wahshat khoni mushkil thi Sahar kiya i'jaz kiya jin logon ne tujh ko ram kiya Meer ke deen o mazhab ko ab poochhte kya ho un ne to Qashqa khencha dair mein baitha kab ka tark-e-islam kiya