مزدور
گرد چہرے پر پسینے میں جبیں ڈوبی ہوئی آنسوؤں میں کہنیوں تک آستیں ڈوبی ہوئی پیٹھ پر نا قابل برداشت اک بار گراں ضعف سے لرزی ہوئی سارے بدن کی جھریاں ہڈیوں میں تیز چلنے سے چٹخنے کی صدا درد میں ڈوبی ہوئی مجروح ٹخنے کی صدا پاؤں مٹی کی تہوں میں میل سے چکٹے ہوئے ایک بدبو دار میلا چیتھڑا باندھے ہوئے جا رہا ہے جانور کی طرح گھبراتا ہوا ہانپتا گرتا لرزتا ٹھوکریں کھاتا ہوا مضمحل واماندگی سے اور فاقوں سے نڈھال چار پیسے کی توقع سارے کنبے کا خیال اپنے ہم جنسوں کی بے مہری سے مایوس و ملول صفحۂ ہستی پر اک سطر غلط حرف فضول اپنی خلقت کو گناہوں کی سزا سمجھے ہوئے آدمی ہونے کو لعنت اور بلا سمجھے ہوئے زندگی کو ناگوار اک سانحہ جانے ہوئے بزم کبر و ناز میں فرض اپنا پہچانے ہوئے راستے میں راہگیروں کی نظر سے بے نیاز شورش ماتم سے نغموں کے اثر سے بے نیاز اس کے دل تک زندگی کی روشنی جاتی نہیں بھول کر بھی اس کے ہونٹوں پر ہنسی آتی نہیں ایک لمحہ بھی نہیں فکر معیشت سے نجات صبح ہو یا شام ہے تاریک اس کی کائنات دیکھ اے قارون اعظم دیکھ اے سرمایہ دار نا مرادی کا مرقع بے کسی کا شاہکار گو ہے تیری ہی طرح انساں مگر مقہور ہے دیکھ اے دولت کے اندھے سانپ یہ مزدور ہے
English rendering
Gard chehre par paseene mein jabeen doobi hui Aansuon mein kohiniyon tak aasteen doobi hui Peeth par na qabil-e-bardasht ik baar-e-giraan Zauf se larzi hui saare badan ki jhurriyaan Haddiyon mein tez chalne se chitakhne ki sada Dard mein doobi hui majrooh takhne ki sada Paun mitti ki tahon mein mail se chakkate hue Ek badboo-daar maila chithda baandhe hue Ja raha hai jaanwar ki tarah ghabrata hua Haanpta girta larazta thokaren khaata hua Muzmahil wa aamindagi se aur faqon se nidhal Char paise ki tawaqqo saare kunbe ka khayal Apne hum-jinson ki be-mehri se mayoos o malool Safha-e-hasti par ik satar-e-ghalat harf-e-fazool Apni khalqat ko gunahon ki saza samjhe hue Aadmi hone ko laanat aur bala samjhe hue Zindagi ko nagawar ik saaneha jaane hue Bazm-e-kibr o naaz mein farz apna pehchane hue Raaste mein rahgeeron ki nazar se be-niyaz Shoresh-e-maatam se naghmon ke asar se be-niyaz Us ke dil tak zindagi ki roshni jaati nahin Bhool kar bhi us ke honton par hansi aati nahin Ek lamha bhi nahin fikr-e-maeeshat se nijaat Subah ho ya shaam hai tareek us ki kainat Dekh ae Qaroon-e-aazam dekh ae sarmaya-daar Na-muradi ka murraqqa be-kasi ka shahkaar Go hai teri hi tarah insaan magar maqhoor hai Dekh ae daulat ke andhe saanp ye mazdoor hai