بھویں تنتی ہیں خنجر ہاتھ میں ہے تن کے بیٹھے ہیں
بھویں تنتی ہیں خنجر ہاتھ میں ہے تن کے بیٹھے ہیں کسی سے آج بگڑی ہے کہ وہ یوں بن کے بیٹھے ہیں دلوں پر سیکڑوں سکے ترے جوبن کے بیٹھے ہیں کلیجوں پر ہزاروں تیر اس چتون کے بیٹھے ہیں الٰہی کیوں نہیں اٹھتی قیامت ماجرا کیا ہے ہمارے سامنے پہلو میں وہ دشمن کے بیٹھے ہیں یہ گستاخی یہ چھیڑ اچھی نہیں ہے اے دل ناداں ابھی پھر روٹھ جائیں گے ابھی تو من کے بیٹھے ہیں اثر ہے جذب الفت میں تو کھنچ کر آ ہی جائیں گے ہمیں پروا نہیں ہم سے اگر وہ تن کے بیٹھے ہیں سبک ہو جائیں گے گر جائیں گے وہ بزم دشمن میں کہ جب تک گھر میں بیٹھے ہیں وہ لاکھوں من کے بیٹھے ہیں فسوں ہے یا دعا ہے یا معمہ کھل نہیں سکتا وہ کچھ پڑھتے ہوئے آگے مرے مدفن کے بیٹھے ہیں بہت رویا ہوں میں جب سے یہ میں نے خواب دیکھا ہے کہ آپ آنسو بہاتے سامنے دشمن کے بیٹھے ہیں کھڑے ہوں زیر طوبیٰ وہ نہ دم لینے کو دم بھر بھی جو حسرت مند تیرے سایۂ دامن کے بیٹھے ہیں تلاش منزل مقصد کی گردش اٹھ نہیں سکتی کمر کھولے ہوئے رستے میں ہم رہزن کے بیٹھے ہیں یہ جوش گریہ تو دیکھو کہ جب فرقت میں رویا ہوں در و دیوار اک پل میں مرے مدفن کے بیٹھے ہیں نگاہ شوخ و چشم شوق میں در پردہ چھنتی ہے کہ وہ چلمن میں ہیں نزدیک ہم چلمن کے بیٹھے ہیں یہ اٹھنا بیٹھنا محفل میں ان کا رنگ لائے گا قیامت بن کے اٹھیں گے بھبوکا بن کے بیٹھے ہیں کسی کی شامت آئے گی کسی کی جان جائے گی کسی کی تاک میں وہ بام پر بن ٹھن کے بیٹھے ہیں قسم دے کر انہیں یہ پوچھ لو تم رنگ ڈھنگ اس کے تمہاری بزم میں کچھ دوست بھی دشمن کے بیٹھے ہیں کوئی چھینٹا پڑے تو داغؔ کلکتے چلے جائیں عظیم آباد میں ہم منتظر ساون کے بیٹھے ہیں
English rendering
Bhavain tanti hain khanjar hath mein hai tan ke baithe hain Kisi se aaj bigdi hai ki woh yun ban ke baithe hain Dilon par saikdon sikke tere joban ke baithe hain Kalejon par hazaron teer us chitvan ke baithe hain Ilahi kyun nahin uthti qayamat majra kya hai Hamare samne pehlu mein woh dushman ke baithe hain Yeh gustaakhi yeh chhed achhi nahin hai aye dil-e-nadan Abhi phir rooth jayenge abhi to maan ke baithe hain Asar hai jazb-e-ulfat mein to khinch kar aa hi jayenge Hamen parwah nahin hum se agar woh tan ke baithe hain Sabuk ho jayenge gar jayenge woh bazm-e-dushman mein Ki jab tak ghar mein baithe hain woh lakhon man ke baithe hain Fasoon hai ya dua hai ya muamma khul nahin sakta Woh kuchh padhte hue aage mere madfan ke baithe hain Bahut roya hoon main jab se yeh main ne khwab dekha hai Ki aap aansoo bahate samne dushman ke baithe hain Khade hon zere tooba woh na dam lene ko dam bhar bhi Jo hasrat-mand tere saya-e-daman ke baithe hain Talash-e-manzil-e-maqsad ki gardish uth nahin sakti Kamar khole hue raste mein hum rahzan ke baithe hain Yeh josh-e-girya to dekho ki jab furqat mein roya hoon Dar-o-dewar ek pal mein mere madfan ke baithe hain Nigah-e-shokh-o-chashm-e-shauq mein dar parda chhanti hai Ki woh chilman mein hain nazdeek hum chilman ke baithe hain Yeh uthna baithna mahfil mein un ka rang layega Qayamat ban ke uthenge bhabooka ban ke baithe hain Kisi ki shamat aayegi kisi ki jaan jayegi Kisi ki taak mein woh baam par ban than ke baithe hain Qasam de kar inhen yeh poochh lo tum rang dhang is ke Tumhari bazm mein kuchh dost bhi dushman ke baithe hain Koi chheenta pade to 'Dagh' Kalkatte chale jayen Azeemabad mein hum muntazir sawan ke baithe hain