کعبے کی ہے ہوس کبھی کوئے بتاں کی ہے
کعبے کی ہے ہوس کبھی کوئے بتاں کی ہے مجھ کو خبر نہیں مری مٹی کہاں کی ہے سن کے مرا فسانہ انہیں لطف آ گیا سنتا ہوں اب کہ روز طلب قصہ خواں کی ہے پیغام بر کی بات پر آپس میں رنج کیا میری زبان کی ہے نہ تمہاری زباں کی ہے کچھ تازگی ہو لذت آزار کے لیے ہر دم مجھے تلاش نئے آسماں کی ہے جاں بر بھی ہو گئے ہیں بہت مجھ سے نیم جاں کیا غم ہے اے طبیب جو پوری وہاں کی ہے حسرت برس رہی ہے ہمارے مزار پر کہتے ہیں سب یہ قبر کسی نوجواں کی ہے وقت خرام ناز دکھا دو جدا جدا یہ چال حشر کی یہ روش آسماں کی ہے فرصت کہاں کہ ہم سے کسی وقت تو ملے دن غیر کا ہے رات ترے پاسباں کی ہے قاصد کی گفتگو سے تسلی ہو کس طرح چھپتی نہیں وہ بات جو تیری زباں کی ہے جور رقیب و ظلم فلک کا نہیں خیال تشویش ایک خاطر نامہرباں کی ہے سن کر مرا فسانۂ غم اس نے یہ کہا ہو جائے جھوٹ سچ یہی خوبی بیاں کی ہے دامن سنبھال باندھ کمر آستیں چڑھا خنجر نکال دل میں اگر امتحاں کی ہے ہر ہر نفس میں دل سے نکلنے لگا غبار کیا جانے گرد راہ یہ کس کارواں کی ہے کیونکہ نہ آتے خلد سے آدم زمین پر موزوں وہیں وہ خوب ہے جو سنتے جہاں کی ہے تقدیر سے یہ پوچھ رہا ہوں کہ عشق میں تدبیر کوئی بھی ستم ناگہاں کی ہے اردو ہے جس کا نام ہمیں جانتے ہیں داغؔ ہندوستاں میں دھوم ہماری زباں کی ہے
English rendering
Kaabe ki hai hawas kabhi koo-e-butan ki hai Mujh ko khabar nahin meri mitti kahan ki hai Sun ke mera fasana unhein lutf aa gaya Sunta hun ab ke roz talab-e-qissa-khwan ki hai Paigham-bar ki baat par aapas mein ranj kiya Meri zaban ki hai na tumhari zaban ki hai Kuch tazgi ho lazzat-e-azaaar ke liye Har dam mujhe talash naye aasman ki hai Jaan-bar bhi ho gaye hain bahut mujh se neem-jaan Kya gham hai aye tabeeb jo poori wahan ki hai Hasrat baras rahi hai hamare mazaar par Kahte hain sab yeh qabr kisi naujawan ki hai Waqt-e-kharam-e-naz dikha do juda juda Yeh chaal hashr ki yeh rawish aasman ki hai Fursat kahan ke hum se kisi waqt to mile Din ghair ka hai raat tere pasbaan ki hai Qasid ki guftugu se tasalli ho kis tarah Chhupti nahin woh baat jo teri zaban ki hai Jaur-e-raqib-o-zulm-e-falak ka nahin khayal Tashweesh ek khatir-e-na-mehrban ki hai Sun kar mera fasana-e-gham us ne yeh kaha Ho jaaye jhoot sach yahi khubi-e-bayan ki hai Daman sambhal, bandh kamar, aasteen chadha Khanjar nikal dil mein agar imtihan ki hai Har har nafas mein dil se nikalne laga ghubar Kya jaane gard-e-rah yeh kis karwan ki hai Kyunkar na aate khuld se Adam zameen par Mauzoon wahin woh khoob hai jo sunte jahan ki hai Taqdeer se yeh puchh raha hun ke ishq mein Tadbeer koi bhi sitam-e-nagaahan ki hai Urdu hai jis ka naam humein jaante hain Dagh Hindustan mein dhoom hamari zaban ki hai