تم آئینہ ہی نہ ہر بار دیکھتے جاؤ
تم آئینہ ہی نہ ہر بار دیکھتے جاؤ مری طرف بھی تو سرکار دیکھتے جاؤ نہ جاؤ حال دل زار دیکھتے جاؤ کہ جی نہ چاہے تو ناچار دیکھتے جاؤ بہار عمر میں باغ جہاں کی سیر کرو کھلا ہوا ہے یہ گلزار دیکھتے جاؤ یہی تو چشم حقیقت نگر کا سرمہ ہے نزاع کافر و دیں دار دیکھتے جاؤ اٹھاؤ آنکھ نہ شرماؤ یہ تو محفل ہے غضب سے جانب اغیار دیکھتے جاؤ نہیں ہے جنس وفا کی تمہیں جو قدر نہ ہو بنیں گے کتنے خریدار دیکھتے جاؤ تمہیں غرض جو کرو رحم پائمالوں پر تم اپنی شوخیٔ رفتار دیکھتے جاؤ قسم بھی کھائی تھی قرآن بھی اٹھایا تھا پھر آج ہے وہی انکار دیکھتے جاؤ یہ شامت آئی کہ اس کی گلی میں دل نے کہا کھلا ہے روزن دیوار دیکھتے جاؤ ہوا ہے کیا ابھی ہنگامہ اور کچھ ہوگا فغاں میں حشر کے آثار دیکھتے جاؤ شب وصال عدو کی یہی نشانی ہے نشان بوسۂ رخسار دیکھتے جاؤ تمہاری آنکھ مرے دل سے لے سبب بے وجہ ہوئی ہے لڑنے کو تیار دیکھتے جاؤ ادھر کو آ ہی گئے اب تو حضرت زاہد یہیں ہے خانۂ خمار دیکھتے جاؤ رقیب برسر پرخاش ہم سے ہوتا ہے بڑھے گی مفت میں تکرار دیکھتے جاؤ نہیں ہیں جرم محبت میں سب کے سب ملزم خطا معاف خطاوار دیکھتے جاؤ دکھا رہی ہے تماشا فلک کی نیرنگی نیا ہے شعبدہ ہر بار دیکھتے جاؤ بنا دیا مری چاہت نے غیرت یوسف تم اپنی گرمئ بازار دیکھتے جاؤ نہ جاؤ بند کئے آنکھ رہروان عدم ادھر ادھر بھی خبردار دیکھتے جاؤ سنی سنائی پہ ہرگز کبھی عمل نہ کرو ہمارے حال کے اخبار دیکھتے جاؤ کوئی نہ کوئی ہر اک شیر میں ہے بات ضرور جناب داغؔ کے اشعار دیکھتے جاؤ
English rendering
Tum aaina hi na har baar dekhte jao Meri taraf bhi to Sarkar dekhte jao Na jao haal-e-dil-e-zaar dekhte jao Ke ji na chahe to nachaar dekhte jao Bahar-e-umr mein bagh-e-jahan ki sair karo Khula hua hai yeh gulzar dekhte jao Yahi to chashm-e-haqeeqat-nagar ka surma hai Niza-e-kafir-o-deen-dar dekhte jao Uthao aankh na sharmao yeh to mehfil hai Ghazab se janib-e-aghyar dekhte jao Nahin hai jins-e-wafa ki tumhein jo qadar na ho Banenge kitne kharidar dekhte jao Tumhein gharaz jo karo rahm paemalon par Tum apni shokhi-e-raftar dekhte jao Qasam bhi khai thi Quran bhi uthaya tha Phir aaj hai wahi inkar dekhte jao Yeh shamat aai ke uski gali mein dil ne kaha Khula hai rozan-e-diwar dekhte jao Hua hai kya abhi hangama aur kuch hoga Fughan mein hashr ke asar dekhte jao Shab-e-visal-e-adu ki yahi nishani hai Nishan-e-bosa-e-rukhsar dekhte jao Tumhari aankh mere dil se le sabab be-wajah Hui hai ladne ko tayyar dekhte jao Idhar ko aa hi gaye ab to Hazrat Zahid Yahain hai khana-e-khumar dekhte jao Raqeeb barsar-e-parhkash hum se hota hai Badhegi muft mein takrar dekhte jao Nahin hain jurm-e-mohabbat mein sab ke sab mulzim Khata maaf khatawar dekhte jao Dikha rahi hai tamasha falak ki nairangi Naya hai shobada har baar dekhte jao Bana diya meri chahat ne ghairat-e-Yusuf Tum apni garmi-e-bazar dekhte jao Na jao band kiye aankh rahrawan-e-adam Idhar udhar bhi khabardar dekhte jao Suni sunai pe hargiz kabhi amal na karo Hamare haal ke akhbar dekhte jao Koi na koi har ek sher mein hai baat zaroor Janab Dagh ke ashaar dekhte jao