عارف ہے وہ جو حسن کا جویا جہاں میں ہے
عارف ہے وہ جو حسن کا جویا جہاں میں ہے باہر نہیں ہے یوسف اسی کارواں میں ہے پیری میں شغل مے ہے جوانانہ روز و شب بوئے بہار آتی ہماری خزاں میں ہے ہوتا ہے گل کے سونگھے سے دونا گرفتہ دل مجھ سا بھی بد دماغ کم اس بوستاں میں ہے پشت خمیدہ دیکھ کے ہوتا ہوں نعرہ زن کرتا ہوں صرف تیر جو زور اس کماں میں ہے دکھلا رہی ہے دل کی صفا دو جہاں کی سیر کیا آئینہ لگا ہوا اپنے مکاں میں ہے دیوانہ جو نہ عشق سے ہو آدمی نہیں حسن پری کا جلوہ طلسم جہاں میں ہے پروانوں کی طرح ہے ہجوم قدح کشاں روشن چراغ بادہ جو مغ کی دکاں میں ہے اس دل ربا کے کوچہ میں آگے ہوا سے جائے اتنی تو جان اب بھی تن ناتواں میں ہے دنیا سے کوچ کرنا ہے اک روز رہروو بانگ جرس سے شور یہی کارواں میں ہے پڑھ سکتا سر نوشت کا مطلب کوئی نہیں معلوم کچھ نہیں کہ یہ خط کس زباں میں ہے آئندہ و روندہ کی چلتی ہیں ٹھوکریں جادہ جو اپنا تھا اسی خواب گراں میں ہے کشتے ہیں باغ میں بھی تری تیغ ناز کے بوئے شہید لالہ میں اور ارغواں میں ہے عاشق کے رنگ زرد کو دیکھو تو ہنس پڑو تاثیر اس میں بھی ہے وہ جو زعفراں میں ہے معدوم وہ کمر ہے نہ موہوم وہ دہن کہتے ہیں شاعر ان کے جو کچھ کچھ گماں میں ہے گل ٹوٹتے ہیں ہوتے ہیں بلبل اسیر دام صیاد مستعد مدد باغباں میں ہے سرکش کی منزلت ہے سبک پیش خاکسار وہ تمکنت زمیں کی کہاں آسماں میں ہے سنبل سے حال گل ہوں میں یہ کہہ کے پوچھتا کس سلسلہ میں تو ہے یہ کس خانداں میں ہے دل میں خیال گیسوئے مشکیں ہے بد بلا یہ مرغ روح کے لیے سانپ آشیاں میں ہے حکمت سے ہے یہ خاک کا پتلا بنا ہوا نور آنکھ میں ہے اس کے تو مغز استخواں میں ہے آتشؔ بلند پایہ ہے درگاہ یار کی ہفتم فلک کی رفعت اسی آستاں میں ہے
English rendering
Aarif hai vo jo husn kā jūyā jahāñ meñ hai Bāhar nahīñ hai Yusuf usī kārvāñ meñ hai Pīrī meñ shughl-e-may hai javānāna roz-o-shab Bū-e-bahār ātī hamārī ḳhizāñ meñ hai Hotā hai gul ke sūñghe se dūnā girifta-dil Mujh sā bhī bad-dimāgh kam is būstāñ meñ hai Pusht-e-ḳhamīda dekh ke hotā huuñ na'ra-zan Kartā huuñ sarf-e-tīr jo zor is kamāñ meñ hai Dikhlā rahī hai dil kī safā do jahāñ kī sair Kyā ā.īna lagā huā apne makāñ meñ hai Dīvāna jo na ishq se ho ādamī nahīñ Husn-e-parī kā jalva tilism-e-jahāñ meñ hai Parvānoñ kī tarah hai hujūm-e-qadah-kashāñ Roshan chirāgh-e-bāda jo mugh kī dukāñ meñ hai Us dilrubā ke kūche meñ aage havā se jā.e Itnī to jaan ab bhī tan-e-nā-tavāñ meñ hai Dunyā se kūch karnā hai ek roz rahrūo Bāñg-e-jaras se shor yahī kārvāñ meñ hai Paṛh saktā sar-e-navisht kā matlab koī nahīñ Ma'lūm kuchh nahīñ ki ye ḳhat kis zabāñ meñ hai Ā.inda o ravanda kī chaltī haiñ ṭhokareñ Jāda jo apnā thā usī ḳhvāb-e-garāñ meñ hai Kashīda haiñ bāgh meñ bhī tirī tegh-e-nāz ke Bū-e-shahīd-e-lāla meñ aur arghavāñ meñ hai Aashiq ke rañg-e-zard ko dekho to hañs paṛo Tāsīr us meñ bhī hai vo jo za'farāñ meñ hai Ma'dūm vo kamar hai na mauhūm vo dahan Kahte haiñ shā'ir un ke jo kuchh kuchh gumāñ meñ hai Gul ṭūṭte haiñ hote haiñ bulbul asīr-e-dām Sayyād musta'id madad-e-bāghbāñ meñ hai Sarkash kī manzilāt hai sabak pesh-e-khāksār Vo tamkanat zamīñ kī kahāñ āsmāñ meñ hai Suñbul se hāl-e-gul huuñ maiñ ye kah ke pūchhtā Kis silsile meñ tū hai ye kis ḳhāndāñ meñ hai Dil meñ ḳhayāl-e-gīsū-e-mushkīñ hai bad-balā Yih murgh-e-rūh ke liye sāñp āshiyāñ meñ hai Hikmat se hai ye ḳhāk kā putlā banā huā Nūr āñkh meñ hai us ke to maghz astiḳhvāñ meñ hai Aatish buland-pāya hai dargāh-e-yār kī Haftum falak kī rif'at usī āstāñ meñ hai