محبت کا تری بندہ ہر اک کو اے صنم پایا
محبت کا تری بندہ ہر اک کو اے صنم پایا برابر گردن شاہ و گدا دونوں کو خم پایا برنگ شمع جس نے دل جلایا تیری دوری میں تو اس نے منزل مقصود کو زیر قدم پایا بجا کرتے ہیں عاشق طاق ابرو کی پرستاری یہی محراب دیر و کعبہ میں بھی ہم نے خم پایا نشانہ تیر تہمت کا ہے میرا اختر طالع اٹھاؤں داغ میں تو آسماں سمجھے درم پایا ہزاروں حسرتیں جاویں گی میرے ساتھ دنیا سے شرار و برق سے بھی عرصۂ ہستی کو کم پایا سوائے رنج کچھ حاصل نہیں ہے اس خرابے میں غنیمت جان جو آرام تو نے کوئی دم پایا نظر آیا تماشائے جہاں جب بند کیں آنکھیں صفائے قلب سے پہلو میں ہم نے جام جم پایا جلایا اور مارا حسن کی نیرنگ سازی نے کبھی برق غضب اس کو کبھی ابر کرم پایا فراق انجام کام آغاز وصلت کا بلا شک ہے بہت رویا میں روح و تن کو جب مشتاق ہم پایا ہر اک جوہر میں اس کا نقش پائے رفتگاں سمجھا دم شمشیر قاتل جادۂ راہ عدم پایا ہمارا کعبۂ مقصود تیرا طاق ابرو ہے تری چشم سیہ کو ہم نے آہوئے حرم پایا ہوا ہرگز نہ خط شوق کا ساماں درست آتشؔ سیاہی ہو گئی نایاب اگر ہم نے قلم پایا
English rendering
Mohabbat ka teri banda har ek ko ae sanam paaya Barābar gardan-e-shāh-o-gadā donoñ ko kham paaya Ba-rang-e-sham'a jis ne dil jalāya teri doori mein To us ne manzil-e-maqsood ko zere-e-qadam paaya Bajā karte hain āshiq tāq-e-abroo ki parastāri Yehi mehrāb-e-dair-o-ka'aba mein bhi ham ne kham paaya Nishāna-e-teer-e-tohmat ka hai mera akhtar-e-tāle' Uthaooñ daagh mein to āsmāñ samjhe diram paaya Hazārōñ hasrateñ jaaveñ gi mere saath duniyā se Sharār-o-barq se bhi arsa-e-hasti ko kam paaya Siwa-e-ranj kuchh hasil nahin hai is kharābe mein Ghanaimat jaan jo ārām tu ne koi dam paaya Nazar āyā tamāshā-e-jahāñ jab band kiñ ānkhein Safā-e-qalb se pahlu mein ham ne jām-e-jam paaya Jalāyā aur mārā husn ki nairang-sāzī ne Kabhi barq-e-ghazab us ko kabhi abr-e-karam paaya Firāq anjām-e-kām āghāz-e-waslat ka bilā shak hai Bahut royā main rooh-o-tan ko jab mushtāq ham paaya Har ek jauhar mein us ka naqsh-e-paa-e-raftagāñ samjhā Dam-e-shamshīr-e-qātil jāda-e-rāh-e-adam paaya Hamārā ka'aba-e-maqsood tera tāq-e-abroo hai Teri chashm-e-siyah ko ham ne āhoo-e-haram paaya Hua hargiz na khat-e-shauq ka sāmāñ durust Atish! Siyāhi ho gaī nāyāb agar ham ne qalam paaya