دفن جب خاک میں ہم سوختہ ساماں ہوں گے
دفن جب خاک میں ہم سوختہ ساماں ہوں گے فلس ماہی کے گل شمع شبستاں ہوں گے ناوک انداز جدھر دیدۂ جاناں ہوں گے نیم بسمل کئی ہوں گے کئی بے جاں ہوں گے تاب نظارہ نہیں آئنہ کیا دیکھنے دوں اور بن جائیں گے تصویر جو حیراں ہوں گے تو کہاں جائے گی کچھ اپنا ٹھکانا کر لے ہم تو کل خواب عدم میں شب ہجراں ہوں گے ناصحا دل میں تو اتنا تو سمجھ اپنے کہ ہم لاکھ ناداں ہوئے کیا تجھ سے بھی ناداں ہوں گے کر کے زخمی مجھے نادم ہوں یہ ممکن ہی نہیں گر وہ ہوں گے بھی تو بے وقت پشیماں ہوں گے ایک ہم ہیں کہ ہوئے ایسے پشیمان کہ بس ایک وہ ہیں کہ جنہیں چاہ کے ارماں ہوں گے ہم نکالیں گے سن اے موج ہوا بل تیرا اس کی زلفوں کے اگر بال پریشاں ہوں گے صبر یا رب مری وحشت کا پڑے گا کہ نہیں چارہ فرما بھی کبھی قیدئ زنداں ہوں گے منت حضرت عیسیٰ نہ اٹھائیں گے کبھی زندگی کے لیے شرمندۂ احساں ہوں گے تیرے دل تفتہ کی تربت پہ عدو جھوٹا ہے گل نہ ہوں گے شرر آتش سوزاں ہوں گے غور سے دیکھتے ہیں طوف کو آہوئے حرم کیا کہیں اس کے سگ کوچہ کے قرباں ہوں گے داغ دل نکلیں گے تربت سے مری جوں لالہ یہ وہ اخگر نہیں جو خاک میں پنہاں ہوں گے چاک پردے سے یہ غمزے ہیں تو اے پردہ نشیں ایک میں کیا کہ سبھی چاک گریباں ہوں گے پھر بہار آئی وہی دشت نوردی ہوگی پھر وہی پاؤں وہی خار مغیلاں ہوں گے سنگ اور ہاتھ وہی وہ ہی سر و داغ جنون وہ ہی ہم ہوں گے وہی دشت و بیاباں ہوں گے عمر ساری تو کٹی عشق بتاں میں مومنؔ آخری وقت میں کیا خاک مسلماں ہوں گے
English rendering
Dafan jab khaak mein hum sokhta samaan honge Fals maahi ke gul shama-e-shabistan honge Nawak-e-andaaz jidhar deeda-e-jaanan honge Neem bismil kai honge kai be-jaan honge Taab-e-nazaara nahin aaina kya dekhne doon Aur ban jaayenge tasveer jo hairan honge Tu kahan jaayegi kuch apna thikana kar le Hum to kal khwab-e-adam mein shab-e-hijraan honge Nasiha dil mein tu itna to samajh apne ke hum Laakh nadaan hue kya tujh se bhi nadaan honge Kar ke zakhmi mujhe nadim hon ye mumkin hi nahin Gar woh honge bhi to be-waqt pashemaan honge Ek hum hi hain ke hue aise pashemaan ke bas Ek woh hain ke jinhein chah ke armaan honge Hum nikalenge sun ae mauj-e-hawa bal tera Uss ki zulfon ke agar baal pareshan honge Sabr ya rab meri wahshat ka padega ke nahin Chara-farma bhi kabhi qaida-e-zindaan honge Minat Hazrat-e-Eisa na uthayenge kabhi Zindagi ke liye sharminda ehsaan honge Tere dil-e-tafta ki turbat pe adu jhoota hai Gul na honge sharar aatish-e-sozaan honge Ghaur se dekhte hain taof ko aahu-e-haram Kya kahein uss ke sag-e-kucha ke qurbaan honge Daagh-e-dil nikalenge turbat se meri joon-e-lala Yeh woh aghar nahin jo khaak mein pinhaan honge Chaak parde se yeh ghamze hain to ae parda-nasheen Ek main kya ke sabhi chaak-gireban honge Phir bahaar aai wohi dasht-navardi hogi Phir wohi paaon wohi khaar-e-mugheelan honge Sang aur haath wohi woh hi sar-o-dagh-e-junoon Wohi hum honge wohi dasht-o-bayaaban honge Umar saari to kati ishq-e-butaan mein Momin Aakhiri waqt mein kya khaak musalman honge