برباد محبت کا بس اتنا فسانہ ہے
برباد محبت کا بس اتنا فسانہ ہے رونے کو نہیں کوئی ہنسنے کو زمانہ ہے کچھ کم نہ تھا ان کا غم اس پر غم ہستی بھی مر مر کے سہی لیکن یہ بوجھ اٹھانا ہے کل مجھ کو تھا غم ان کا اب ان کو ہے غم میرا اک وہ بھی زمانہ تھا اک یہ بھی زمانہ ہے یکتائی و کثرت میں ہے فرق تو بس اتنا سمٹے تو مرا دل ہے پھیلے تو زمانہ ہے اللہ عجب شے ہے یہ جذب محبت بھی دیکھیں وہ کسی جانب دل میرا نشانہ ہے چھایا ہوا ہر شے پر عالم ہے جوانی کا جوبن پہ ہے فصل گل مٹنے کا زمانہ ہے اس دکھ بھری دنیا کی اوقات بس اتنی ہے دیکھو تو حقیقت ہے سمجھو تو فسانہ ہے وہ دور ہوس کا تھا یہ دور محبت ہے جب غم کو بھلاتے تھے اب خود کو بھلانا ہے باقی نہ کہیں دل میں رہ جائے کوئی ارماں تھوڑا سا بھٹک بھی لیں منزل پہ تو آنا ہے تھے غالبؔ و مومنؔ بھی یکتائے جہاں لیکن وہ ان کا زمانہ تھا یہ میرا زمانہ ہے دم لینے بھی دے ساحرؔ ظالم یہ غم دوراں بربادیٔ الفت پر دو اشک بہانا ہے
English rendering
Barbaad-e-mohabbat ka bas itna fasana hai Rone ko nahin koi hansne ko zamana hai Kuch kam na tha un ka gham us par gham-e-hasti bhi Mar mar ke sahi lekin ye bojh uthana hai Kal mujh ko tha gham un ka ab un ko hai gham mera Ik wo bhi zamana tha ik ye bhi zamana hai Yaktaai-o-kasrat mein hai farq to bas itna Simte to mira dil hai phailay to zamana hai Allah ajab shai hai ye jazb-e-mohabbat bhi Dekhen wo kisi jaanib dil mera nishana hai Chhaaya hua har shai par aalam hai jawani ka Joban pe hai fasl-e-gul mitne ka zamana hai Is dukh bhari duniya ki auqaat bas itni hai Dekho to haqeeqat hai samjho to fasana hai Wo daur-e-hawas ka tha ye daur-e-mohabbat hai Jab gham ko bhulate the ab khud ko bhulana hai Baaqi na kahin dil mein reh jaaye koi armaan Thoda sa bhatak bhi lein manzil pe to aana hai The Ghalib-o-Momin bhi yakta-e-jahan lekin Wo un ka zamana tha ye mera zamana hai Dam lene bhi de Sahir, zaalim ye gham-e-dauraan Barbaadi-e-ulfat par do ashk bahana hai