کتنی رنگیں ہے فضا کتنی حسیں ہے دنیا
کتنی رنگیں ہے فضا کتنی حسیں ہے دنیا کتنا سرشار ہے ذوق چمن آرائی آج اس سلیقے سے سجائی گئی بزم گیتی تو بھی دیوار اجنتا سے اتر آئی آج رونمائی کی یہ ساعت یہ تہی دستیٔ شوق نہ چرا سکتا ہوں آنکھیں نہ ملا سکتا ہوں پیار سوغات، وفا نذر، محبت تحفہ یہی دولت ترے قدموں پہ لٹا سکتا ہوں کب سے تخئیل میں لرزاں تھا یہ نازک پیکر کب سے خوابوں میں مچلتی تھی جوانی تیری میرے افسانے کا عنوان بنی جاتی ہے ڈھل کے سانچے میں حقیقت کے کہانی تیری مرحلے جھیل کے نکھرا ہے مذاق تخلیق سعئ پیہم نے دیے ہیں یہ خد و خال تجھے زندگی چلتی رہی کانٹوں پہ، انگاروں پر جب ملی اتنی حسیں، اتنی سبک چال تجھے تیرے قامت میں ہے انساں کی بلندی کا وقار دختر شہر ہے، تہذیب کا شہکار ہے تو اب نہ جھپکے گی پلک، اب نہ ہٹیں گی نظریں حسن کا میرے لیے آخری معیار ہے تو یہ ترا پیکر سیمیں، یہ گلابی ساری دست محنت نے شفق بن کے اڑھا دی تجھ کو جس سے محروم ہے فطرت کا جمال رنگیں تربیت نے وہ لطافت بھی سکھا دی تجھ کو آگہی نے تری باتوں میں کھلائیں کلیاں علم نے شکریں لہجے میں نچوڑے انگور دل ربائی کا یہ انداز کسے آتا تھا تو ہے جس سانس میں نزدیک اسی سانس میں دور یہ لطافت، یہ نزاکت، یہ حیا، یہ شوخی سو دیے جلتے ہیں امڈی ہوئی ظلمت کے خلاف لب شاداب پہ چھلکی ہوئی گلنار ہنسی اک بغاوت ہے یہ آئین جراحت کے خلاف حوصلے جاگ اٹھے سوز یقیں جاگ اٹھا نگہ ناز کے بے نام اشاروں کو سلام تو جہاں رہتی ہے اس ارض حسیں پر سجدہ جن میں تو ملتی ہے ان راہ گزاروں کو سلام آ قریب آ کہ یہ جوڑا میں پریشاں کر دوں تشنہ کامی کو گھٹاؤں کا پیام آ جائے جس کے ماتھے سے ابھرتی ہیں ہزاروں صبحیں مری دنیا میں بھی ایسی کوئی شام آ جائے
English rendering
Kitni rangeen hai faza kitni haseen hai duniya Kitna sarshaar hai zauq-e-chaman aaraai aaj Is saleeqe se sajaai gai bazm-e-geeti Tu bhi deewar-e-Ajanta se utar aai aaj Roonumaai ki yeh saa'at yeh tehi-dasti-e-shauq Na chura sakta hoon aankhen na mila sakta hoon Pyaar saughaatt, wafa nazr, mohabbat tohfa Yehi daulat tere qadmon pe luta sakta hoon Kab se takhayyul mein larzaan tha yeh nazuk paikar Kab se khwaabon mein machalti thi jawani teri Mere afsaane ka unwan bani jaati hai Dhal ke saanche mein haqeeqat ke kahani teri Marhale jheel ke nikhra hai mazaaq-e-takhleeq Sa'i-e-paiham ne diye hain yeh khadd-o-khaal tujhe Zindagi chalti rahi kaanton pe, angaaron par Jab mili itni haseen, itni sabuk chaal tujhe Tere qamat mein hai insaan ki bulandi ka waqar Dukhtar-e-shehr hai, tehzeeb ka shahkaar hai tu Ab na jhapkegi palak, ab na hatengi nazren Husn ka mere liye aakhri miyaar hai tu Yeh tera paikar-e-seemee'n, yeh gulabi saari Dast-e-mehnat ne shafaq ban ke udha di tujh ko Jis se mehroom hai fitrat ka jamal-e-rangeen Tarbiat ne wo lataafat bhi sikha di tujh ko Aagahi ne teri baaton mein khilayin kaliyan Ilm ne shakareen lehje mein nichode angoor Dilrubaai ka yeh andaaz kise aata tha Tu hai jis saans mein nazdeek usi saans mein door Yeh lataafat, yeh nazaakat, yeh haya, yeh shokhi Sau diye jalte hain umdi hui zulmat ke khilaaf Lab-e-shadaab pe chhalki hui gulnaar hansi Ek baghawat hai yeh aa'in-e-jarahat ke khilaaf Hausle jaag uthe soz-e-yaqeen jaag utha Nigah-e-naaz ke be-naam ishaaron ko salaam Tu jahan rehti hai is arz-e-haseen par sajda Jin mein tu milti hai un raah guzaaron ko salaam Aa qareeb aa ke yeh joda main pareshan kar doon Tishna-kami ko ghataon ka payam aa jaaye Jis ke maathe se ubharti hain hazaaron subhen Meri duniya mein bhi aisi koi shaam aa jaaye