مرض عشق جسے ہو اسے کیا یاد رہے
مرض عشق جسے ہو اسے کیا یاد رہے نہ دوا یاد رہے اور نہ دعا یاد رہے تم جسے یاد کرو پھر اسے کیا یاد رہے نہ خدائی کی ہو پروا نہ خدا یاد رہے لوٹتے سیکڑوں نخچیر ہیں کیا یاد رہے چیر دو سینے میں دل کو کہ پتا یاد رہے رات کا وعدہ ہے بندے سے اگر بندہ نواز بند میں دے لو گرہ تا کہ ذرا یاد رہے قاصد عاشق سودا زدہ کیا لائے جواب جب نہ معلوم ہو گھر اور نہ پتا یاد رہے دیکھ بھی لینا ہمیں راہ میں اور کیوں صاحب ہم سے منہ پھیر کے جانا یہ بھلا یاد رہے تیرے مدہوش سے کیا ہوش و خرد کی ہو امید رات کا بھی نہ جسے کھایا ہوا یاد رہے کشتۂ ناز کی گردن پہ چھری پھیرو جب کاش اس وقت تمہیں نام خدا یاد رہے خاک برباد نہ کرنا مری اس کوچے میں تجھ سے کہہ دیتا ہوں میں باد صبا یاد رہے گور تک آئے تو چھاتی پہ قدم بھی رکھ دو کوئی بیدل ادھر آئے تو پتا یاد رہے تیرا عاشق نہ ہو آسودہ بہ زیر طوبیٰ خلد میں بھی ترے کوچے کی ہوا یاد رہے باز آ جائیں جفا سے جو کبھی آپ تو پھر یاد عاشق کو نہ کیجے گا بھلا یاد رہے داغ دل پر مرے پھاہا نہیں ہے انگارا چارہ گر لیجو نہ چٹکی سے اٹھا یاد رہے زخم دل بولے مرے دل کے نمک خواروں سے لو بھلا کچھ تو محبت کا مزا یاد رہے حضرت عشق کے مکتب میں ہے تعلیم کچھ اور یاں لکھا یاد رہے اور نہ پڑھا یاد رہے گر حقیقت میں ہے رہنا تو نہ رکھ خود بینی بھولے بندہ جو خودی کو تو خدا یاد رہے عالم حسن خدائی ہے بتوں کی اے ذوقؔ چل کے بت خانے میں بیٹھو کہ خدا یاد رہے
English rendering
Marz-e-ishq jise ho use kya yaad rahe Na dawa yaad rahe aur na dua yaad rahe Tum jise yaad karo phir use kya yaad rahe Na khudaai ki ho parwa na Khuda yaad rahe Loot-te sainkdon nakhcheer hain kya yaad rahe Cheer do seene mein dil ko ke pata yaad rahe Raat ka wa'da hai bande se agar banda-nawaz Band mein de lo girah taake zara yaad rahe Qaasid-e-ashiq-e-sauda-zada kya laaye jawaab Jab na maloom ho ghar aur na pata yaad rahe Dekh bhi lena hamein raah mein aur kyoon sahib Hum se munh pher ke jaana ye bhala yaad rahe Tere madhosh se kya hosh-o-khirad ki ho ummeed Raat ka bhi na jise khaaya hua yaad rahe Kushta-e-naaz ki gardan pe chhuri phero jab Kaash us waqt tumhein naam-e-Khuda yaad rahe Khaak barbaad na karna meri us kuche mein Tujh se keh deta hoon main baad-e-saba yaad rahe Gor tak aaye to chhaati pe qadam bhi rakh do Koi bedil idhar aaye to pata yaad rahe Tera ashiq na ho aasooda ba-zer-e-tooba Khuld mein bhi tere kuche ki hawa yaad rahe Baaz aa jaayen jafa se jo kabhi aap to phir Yaad ashiq ko na keeje ga bhala yaad rahe Daagh-e-dil par mere phaaha nahin hai angaara Charah-gar lejo na chutki se utha yaad rahe Zakhm-e-dil bole mere dil ke namak-khwaaron se Lo bhala kuch to mohabbat ka maza yaad rahe Hazrat-e-ishq ke maktab mein hai taleem kuch aur Yaan likha yaad rahe aur na padha yaad rahe Gar haqeeqat mein hai rehna to na rakh khud-beeni Bhoole banda jo khudi ko to Khuda yaad rahe Aalam-e-husn-e-khudaai hai buton ki aye Zauq Chal ke but-khane mein baitho ke Khuda yaad rahe