سپیکرز
آبدار خان کا پیش کردہ کلام
بات کم کیجیے ذہانت کو چھپاتے رہیے
بات کم کیجیے ذہانت کو چھپاتے رہیے اجنبی شہر ہے یہ دوست بناتے رہیے دشمنی لاکھ سہی ختم نہ کیجیے رشتہ دل ملے یا نہ ملے ہاتھ ملاتے رہیے یہ تو چہرے کا فقط عکس ہے تصویر نہیں اس پہ کچھ رنگ ابھی اور چڑھاتے رہیے غم ہے آوارہ اکیلے میں بھٹک جاتا ہے جس جگہ رہیے وہاں ملتے ملاتے رہیے جانے کب چاند بکھر جائے گھنے جنگل میں گھر کی چوکھٹ پہ کوئی دیپ جلاتے رہیے
آئے گا کوئی چل کے خزاں سے بہار میں
آئے گا کوئی چل کے خزاں سے بہار میں صدیاں گزر گئی ہیں اسی انتظار میں چھڑتے ہی ساز بزم میں کوئی نہ تھا کہیں وہ کون تھا جو بول رہا تھا ستار میں یہ اور بات ہے کوئی مہکے کوئی چبھے گلشن تو جتنا گل میں ہے اتنا ہے خار میں اپنی طرح سے دنیا بدلنے کے واسطے میرا ہی ایک گھر ہے مرے اختیار میں تشنہ لبی نے ریت کو دریا بنا دیا پانی کہاں تھا ورنہ کسی ریگ زار میں مصروف گورکن کو بھی شاید پتہ نہیں وہ خود کھڑا ہوا ہے قضا کی قطار میں